Evelyn Wever-Croes a felicita Marcel Daniëls cu Condecoracion Real

E ta di Haagse Hogeschool

• Condecora pa su trabao pa Reino y pa Aruba 

ORANJESTAD (AAN): “Cu hopi alegria y orguyo mi ta felicita Marcel Daniëls, docente na De Haagse Hogeschool, cu su merecido Condecoracion Real dia 25 di augustus ultimo. E reconocimento aki ta un aprecio pa su añanan di dedicacion pa aumenta conocemento y comprension na Hulanda riba nos paisnan den Caribe. Y mi ta orguyoso y contento di por a contribui na e Condecoracion aki.”  Esey ta loke Parlamentario Evelyn Wever-Croes a comenta den fin di siman.

   El a bisa cu Marcel a haci hopi mas cu loke normalmente ta wordo spera di un docente. El a compronde cu relacionnan den Reino no por wordo siña solamente for di buki desde Den Haag. Pa por compronde Aruba, bo mester bin Aruba, papia cu nos pueblo, conoce nos realidad y escucha nos perspectiva.

   Danki na su iniciativa, studiantenan di De Haagse Hogeschool di e materia “Koninkrijksrelaties” a bishita Aruba durante varios aña. Como minister-president, mi a recibi tres grupo di studiante, den 2023, 2024 y 2025. Cada aña e programa a crece y a bira mas profundo, cu participacion di mas studiante, expertonan y, eventualmente, tambe colaboracion cu Universidad di Aruba.

   Esaki ta importante, pasobra tur dia tin decisionnan ta wordo tuma na Den Haag cu tin impacto directo riba Aruba, mientras cu conocemento di nos realidad no semper ta suficiente ayanan. Marcel ta contribui na prepara un generacion nobo di lidernan, conseheronan y profesionalnan cu tin un mihor comprension di e diferente paisnan den di Reino.

   Mi kier gradici Marcel tambe pa su colaboracion valioso cu nos gobierno Gabinete Wever-Croes y pa e manera profesional y constructivo cu el a contribui durante mi periodo como minister-president.

   Su reconocimento ta bon mereci. Mi ta spera cu su ehempel lo wordo sigui door di hopi mas: construi brugnan, comparti conocemento y traha pa un relacion mas igual y respetuoso den di Reino.

   Felicitacion, Marcel, y danki pa loke bo a haci pa Aruba y pa Reino.