Rish Ann Ammerlaan, Trahado Social di FCVR:
ORANJESTAD (AAN) Señora Rish Ann Ammerlaan, Trahador Social di Fundacion contra Violencia Relacional, den entrevista cu DIARIO, a duna di conoce cu nan tin alomenos 100 cliente e aña aki.
El a señala cu nan shelter a aumenta cu 50% (unda e mamanan por keda cu nan yiunan), compara cu añanan anterior y e estadia ta hopi mas largo, door cu e casonan ta hopi compleho.
“Ora cu nos ta papia di shelter, ta tur sobreviviente di violencia domestico, sea ta violencia emocional, abuso verbal, abuso economico, of un combinacion di nan. Mayoria biaha ta un combinacion di tur e tipo di violencianan y esaki ta e motibonan pa cual clientenan por haya alohamento temporal, cerca nos”, Ammerlaan a señala.
Señora Ammerlaan a indica cu nos mester siña un tiki di e historia di violencia pa compronde di unda esaki ta bin, pero tambe kico tin den e contexto di amor den e comunidad. Kico ta e concepto cu ta wordo maneha. Aworaki ta uza hopi e palabra “toxico”. “Un relacion toxico, e pareha ta controla, jaloers excesivo. Kico ta pasa cu esaki nos tin cu tene cuidao, pasobra e ta minimiza e violencia cu ta tuma lugar, y esaki no ta algo normal ni aceptable tampoco”, señora Ammerlaan a señala.
Pues, e ta varia di diferente factor cu ta hunga un rol. FCVR ta evalua cada caso cu ta bin cerca dje, pasobra tur ta bin pa violencia domestico, pero cada un su necesidadnan y caso ta diferente, el a splica. “Cada un ta haya e atencion debido cu nan ta rekeri”, señora Ammerlaan a splica.
