Espectacular tabata e show presenta pa Scol di Baile Diana Antonette

ORANJESTAD (AAN): Den fin di siman, Minister Endy Croes acompaña pa su esposa Dilailah Croes-Odor

a presencia e show di baile titula: “The Celebration of Dance” organiza pa docente di baile y coreografo Pierangely Wever di Scol di Baile Diana Antonette.

   Dia 29 di april cu a pasa, a conmemora Dia Mundial di Baile y en conexion cu e fecha special aki a presenta un magnifico show di baile. Un sala di Cas di Cultura completamente yen a presencia e show colorido, talentoso y creativo. Tabatin diferente show di entre otro, ballet clasico, salsa, hip hop, baile cultural, baile contemporaneo y reggaeton presenta pa diferente grupo di baile di chikito te grandi.

   Tambe Señora Diana Antonette a haci un magnifico presentacion di flamenco e anochi aki. Por ultimo, Minister Endy Croes ta gradici Scol di Baile Diana Antonette p’e invitacion y caluroso recepcion. Alavez ta felicita nan cu un bunita show. “Nos a disfruta di cada momento di e presentacion”, Minister Endy Croes a expresa.