Auroranan boreal masha bunita a wordo mira na hopi pais debi na e tormenta solar den fin di siman

ORANJESTAD (AAN): E fin di siman cu a caba di pasa, por a mira cu debi na un tormenta solar severo,

e luznan di panort (aurora boreal) a keda visibel den varios region di Merca, tambe Latinoamerica (Argentina, Chile, Salvador, Puerto Rico) y otro regionnan di mundo manera Alemania, Australia. E fenomeno raro aki tabata presente durante e fin di siman.

            Centro di Prediccion di Tempo Espacial di Administracion di Oceano y Atmosfera Nacional di Merca (The National Oceanic and Atmospheric Administration’s Space Weather Prediction Center) a duna un alerta di tormenta geomagnetico severo dia 10 di Mei pa prome biaha desde 2005.

            Den un 'update' riba 'X dia 12 di mei, e agencia a bisa cu e "tormenta geomagnetico severo pa extremo" tabata posibel pa diasabra anochi tambe.

            E tormenta geomagnetico a bira intensivo y esey a nifica cu e luznan di panort tabata "mas amplio y por a wordo mira na latitudnan mas abou.

            Kico a pasa? Centro di Prediccion di Tempo Espacial a comparti c'un eyeccion di masa coronal a wordo "anticipa pa uni y yega tera dia 10 di Mei of  11 di Mei. Un eyeccion di masa coronal ta un "erupcion di material solar," y ora cu ta yega cerca tera, por resulta den un tormenta geomagnetico.

            Esaki ta pone e luznan di panort briya mas intensivamente y por ta visibel pazuid mas cu usual.

             E evento raro no ta peligroso pa hende, pero por tabatin impacto riba tecnologia. Den un tweet dia 11 di Mei, e agencia a bisa cu e tormenta aparentemente a causa raportnan di "iregularidatnan den red di coriente" manera tambe "degradacion den comunicacionnan di alto frecuencia y GPS."

            Na Aruba, por ehempel, no tin raportnan ainda di ningun luz cu por a wordo mira relaciona cu e evento aki. Sinembargo, locual si por a experencia ta cu tabata tin hopi calor y esaki si por tabata debi na e tormenta geomagnetico.

            Kisas, tambe, por a experencia algun iregularidad den e rednan di telecomunicacion, pero esaki lo tende mas di dje den e proximo dianan si esey tabata e caso pa Aruba.

            E evento aki a capta masha hopi atencion riba e rednan social caminda hende di tur part'i mundo a comparti nan potretnan espectacular di e fenomeno aki.

            E luznan di panort, tambe conoci como auroranan boreal, por wordo mira generalmente cerca di e polonan magnetico di tera. Esaki ta inclui regionnan manera Alaska, Canada, Noruega, Suecia, Finlandia, Iceland, Rusia, Greenland, y Antarctica.

            Sinembargo, durante un tormenta geomagnetico severo, nan por wordo mira na latitudnan mas abou, manera na partinan di Merca, particularmente den regionnan den e noordoost di Merca. E intensidad y frecuencia di e luznan di panort por varia dependiendo di varios factor manera e actividad solar y e claridad di e cielonan.

            Riba un imagen adhunto por haya sa e paisnan unda e auroranan boreal a wordo mira.