ORANJESTAD (AAN) – Parlamentario Shailiny Tromp-Lee, di fraccion di Partido Movimento Electoral di Pueblo (MEP), a toca e tema di FASE, durante e conferencia di prensa di su fraccion, Dialuna.
Shailiny Tromp-Lee a referi na e hecho cu, recientemente, gobierno a anuncia cu e luna di November aki, ta e ultimo luna cu Gobierno ta otorga e yudanza di FASE.
Esaki ta algo cu nan tabata anticipando, pero mirando cu gobierno a anuncia cu esaki ta e delaster luna, mas cu claro, ta surgi yen di pregunta y preocupacion.
“Mi tin cu bisa cu desde aña pasa April 2020, te cu October ultimo, gobierno a otorga algo mas cu 76 miyon na yudanza di FASE. Un fondo cu a keda crea door di solidarismo di sector publico y semi-publico, y di salario di minister y parlamentarionan” el a menciona.
Tin preocupacion pasobra te October ainda, un total di 2700 persona ta ricibi FASE. Enberdad ta un grupo hopi menos cu loke a conoce e prome luna cu gobierno a otorga FASE, cu 11 mil hende a haya e yudanza aki, pero gradualmente esaki a bin ta baha, te cu October ultimo cu ta wordo menciona un total di 2700 ciudadano.
“Mi ta preocupa pasobra prome cu Covid, ya tabata tin un desempleo di luho. Mi ta yame desempleo di luho pasobra tabata existi cuponan di trabao y tabata existi un grupo di hende desemplea. Pero tabata conoci tambe cu e grupo di hendenan desemplea, cu en principio bo por a match e funcionnan cu ta habri, pa un motibo of otro, no tabata logra esaki. Sigur den e industria di hotel tabata na unda e fenomeno aki, a keda mas vocifera”, e parlamentario a señala.
E ta menciona como motibonan pa cual e hendenan no tabata kier traha, den e industria aki, ta pasobra nan no kier traha shift, nan no kier traha dianan di fiesta, y si ta posible no kier traha anochi. Segun Trmp-Lee tin yen di argumento cu hendenan a uza ultimo tempo, cu cierto funcionnan no a keda yena mas pa hendenan local y, mas y mas, a bay over na importa hende, a bin di afo pa eherce e funcionnan aki, y aworaki e no ta bay otro, e ta bay keda mescos atrobe, e parlamentario a subraya.
“Nos tin un grupo di 2700 cu nan ‘samenstelling’ ta medio conoci, tin cu no sa si ta bay recupera nan trabao, por ehemplo taxista y musiconan, etc., pero tin un grupo, cu nos ta conciente, cu ta bay bira dificil pa re-aloca nan na pia di trabao. Y mescos ta conta pa e grupo prome cu Covid-19 cu ya tabata desemplea. Pesey mi ta hopi contento cu gobierno ta enfatiza cu ta bay pone urgencia den e parti di job-matching, na Departamento di DPL, unda cu e persona desemplea por bay registra pa un trabao”, Shailiny Tromp-Lee a señala.
El a agrega cu si subi na e face-page di DPL por ripara cu tin hopi funcion habri, pero na mes momento por realiza cu por ta e persona ta carece di e capacidad of conocemento, pa eherce cierto funcionnan, pero na mes momento tin e yudanza unda e persona mes por percura pa inverti den su mes den cursonan di Enseñanza pa Empleo, pa bo haya e conocemento y capacidad pa enberdad bo por eherce e funcionnan cu ta habri awo riba nos mercado laboral. Asina e dama Parlamentario a expresa.
