AHATA hunto cu CHTA Education Foundation a brinda curso ‘Service Refresher’

ORANJESTAD (AAN): Pa sostene nan miembronan den crecemento consistente, Aruba Hotel & Tourism Association den colaboracion cu e Caribbean Hotel & Tourism Association (CHTA)

a brinda curso pa manager y trahado den departamentonan di Housekeeping y Food & Beverage. E cursonan a wordo atendi pa mas cu 90 participante di diferente hotel y restaurant.

            E meta di e cursonan tabata pa motiva e participantenan pa brinda servicio amabel, cordial, y siguiendo medidanan di COVID y mehora satisfaccion di nan clientenan. Pa ricibi nan certificado cada participante mester a completa un dia di practica y teoria.

            E prome curso ‘Housekeeping Service Refresher Course’ a yuda participantenan refresca areanan importante di nan trabao manera:

- Proceduranan practico pa Housekeeping

- Expandiendo e conocemento di protocol di COVID-19

- Tacticanan pa comunicacion eficiente

            E Segundo curso ‘Food & Beverage Service Refresher Course’ a enfoca riba e aspectonan fundamental di F&B manera:

- Conocemento di cuminda y preparacion

- Bebida y concepto basico di biña

- Basico di benta sugestivo y tecnica pa ‘upsell’

- Lenguahe aceptabel pa un comunicacion autentico cu e cliente

            E curso a cubri ademas areanan manera comunicacion verbal y no verbal, procedura di COVID-19 pa un servicio ‘safe’, y otro aspectonan di servicio. E instructornan tabata Suzanne Shillingford-Brooks y Louise John di CHTA Education Foundation. Ambos tabata tin hopi animo y a comparti nan experencia y conocemento operacional.

            A pesar di e dificultadnan cu e pandemia a trece, AHATA ta keda hopi activo y ta sigui sostene su miembronan cu diferente esfuerso, incluyendo mehoracion di nos producto turistico.