Michael Lin, VWI haciendo uso di nan derecho:
ORANJESTAD (AAN) –Den un conferencia di prensa cu a tuma lugar dilanti Ministerio Publico, señor Michael Lin, Secretario di Sindicato VWI, a bisa cu nan a bay para dilanti di Ministerio Publico, pa haci uso di su derecho di pidi OM pa haci un investigacion riba e forma di procede di Utilities Aruba, y esaki segun ley.
Lin a expresa cu nan no a yega eynan di un dia pa otro, pero pa basta tempo caba e sindicato ta expresando su mes tocante loke ta pasando na WEB Aruba NV, y particularmente riba loke Utilities Aruba ta haciendo ultimo tempo, specificamente tocante e EOI pa mas energia di biento.
El a señala cu e sindicato a papia cu diferente stakeholders den e comunidad, y diferente gremio sindical, personanan cu ta representa ley y no a keda VWI cu bin na Ministerio Publico pa nan haci e peticion menciona.
E sindicalista a agrega cu VWI ta lamenta tambe cu na nivel halto di maneho, di companianan estatal, e tipo di movecionnan aki ta tuma lugar, mientras cu nan sa cu e no ta cuadra cu statutonan di e companianan WEB Aruba NV y Utilities Aruba, y cu ta contra ley y mas ainda, contra nan Codigo di Corporate Governance.
“Nos ta reitera cu nos no ta contra ningun iniciativa cu ta promove energia renovable of alternativo duradero; es mas, e ta forma parti di nos ‘roadmap’. Un roadmap cu a wordo aproba y comunica na nos bestuurs y hasta gobiernonan di diferente signature e ultimo añanan, pues no mester ta sorpresa pa ningun hende, kico WEB Aruba NV ta haciendo”, Lin a indica.
El a agrega cu mirando tambe e iniciativa cu e gobierno actual tin pa aplica “corporate governance” y cu nan ta bezig cu e ley y e Codigo tambe, VWI a contento cu esaki ta tumando lugar, y hasta haci un yamada na e gobernantenan pa tira un bista riba locual ta pasando, en todo caso, na Utilities Aruba.
El a remarca cu WEB Aruba NV y Utilities Aruba, tur dos tin statutonan cu ta describi exactamente e rol y responsabilidad di cada un partido. El a subraya cu locual Utilities ta haciendo cu e EOI ta simplemente contra e statutonan aki, contra ley, y esey ta locual nan ta cuestionando.
