Jurette Croes, PR di DVG:
*Bin pasa tur test y garantiza cu bo ta saludable
*Cu no tin malesa transmisible atravez di cuminda
ORANJESTAD (AAN) – Den entrevista cu Matutino DIARIO, e Relacionista Publico di DVG, señora Jurette Croes, a comenta cu den temporada di Fin di Aña hopi hende ta traha diferente cuminda pa bende, pa wak si nan por haya un tiki entrada extra.
“Nos, como Salubridad Publico, nos preocupacion semper ta na nos comunidad, na prome instante, pa wak unda nan ta cumpra nan cuminda, pa no cumpra cuminda unda cu ta, no pasobra e cuminda ta barata ta nifica cu e ta bon. P’esey paga atencion na unda bo ta cumpra bo cuminda, cerca ken bo ta cumpre. Esnan cu ta traha cuminda, si nan kier propaganda nan mes como personanan higienico, cu ta haci nan esfuerzo pa produci un bon cuminda, semper na Departamento di Salubridad Publico nan por pidi pa un carnet (carchi berde) un certificado di salud, nan ta haci nan testnan necesario e ora ey nan por garantiza cu nan ta den estado saludable, cu por produci cuminda pa bende”, señora Jurette Croes a señala.
Esaki ta importante pasobra e persona sa cu e no tin ningun malesa cu e por transmiti atravez di cuminda, Croes ta enfatiza.
