Director di Dimas Kathleen Ruiz-Paskel:
ORANJESTAD (AAN): Director di Departamento di Integracion, Maneho y Admision di Stranhero (Dimas), señora Kathleen Ruiz-Paskel durante un entrevista cu DIARIO a declara cu ainda tin e problematica di peticionnan incompleto cu ta drenta na Dimas cu a lo largo ta haci e trabou mas dificil y dobbel. Esakinan ta esnan cu ta entrega via nan mes como dunador di trabou via e portal online of a uza un tercer parti pa entrega. Ora di entrega completo, Dimas por hinc’e den e sistema corectamente y lo duna un contesta mas lihe. Señora Paskel a remarca cu Dimas ta evaluando internamente con pa mehora esaki.
Pa loke ta e peticionnan di trayecto cuatro cu ta bay via cita, ta drentando completo. Dimas den e casonan aki tin control di e documentonan cu ta wordo entrega. Segun Paskel, Dimas ta evaluando con pa haci cu e otro trayectonan tambe cana bon di manera cu e cliente ta sigur cu su documentonan a drenta completo pa Dimas sigui cu e procedura debidamente.
