ORANJESTAD (AAN): Despues cu na 2009 a firma un protocol entre Hulanda y Aruba riba tereno di cultural y educacion,
awor Stichting Monumentenfonds Aruba lo ricibi e di cuater ‘tranche’ di prestamo na un interes abou for di Nationaal Restauratiefonds Hulanda (NRF).
Ya entre 2011 pa 2015 a logra haya un total di 2 miyon euro na interes abou cu cual a restaura entre otro e watertorennan na Playa y San Nicolas, California Lighthouse y Nicolaas Store.
E siman aki e directiva di Stichting Monumentenfonds Aruba a firma pa ricibi e ‘vierde tranche’ di prestamo na interes abou for di NRF. Ta trata di un prestamo di mey miyon euro na 0,5 porciento di interes pa un periodo di trinta aña largo.
E fondonan aki lo ta destina pa e restauracion di Steenweg 19 conoci manera Ex Botica Aruba y Cas Tan Tin. SMFA sigur ta hopi agradecido na NRF pa e prestamo pa asina nos por continua cu mas proyectonan di restauracion y tambe ta hopi contento cu e desaroyonan local tambe riba tereno di monumentonan.
