Aworaki tin 77.108 auto cu A-nummer registra riba Aruba
ORANJESTAD (AAN): Den un entrevista cu Meverly Romano di Departamento di Impuesto (DIMP) na Aruba, el a splica cu riba e isla en total nan tin 89.072 vehiculo di motor registra. E categoria di mas grandi ta keda esnan cu tin plachi di A-nummer.
Te cu Dialuna mainta, en total na Aruba tin un total di 77.108 auto personal cu A-nummer registra.
Relaciona cu Impuesto di Motor pa 2023, un total di 53% di automobilistanan cu a cumpli e pago di ‘voljaar’, pues henter aña a paga e plachi di number. Tambe tin 28% cu a cumpli cu e ‘1e halfjaar’, pues e prome mitar di aña pa paga plachi di number. Pues e 28% aki tin di bay cumpli cu e di dos mitar di aña aki un rato.
Esey ta pone cu tin un grupo di 15.153 cu no a haci pago mes pa 2023. Esaki ta representa 17%.
Loke DIMP ta mira di e automobilistanan cu si ta cumpliendo ta como 81% (esta e 51% y e 28% cu a paga 1er mitar aña).
Romano ta sugeri comunidad cu tin di paga e 2ndo mitar, cu ainda DIMP ta ofrece e servicio di ‘Pago Parcial’ via online, unda bo ta paga mitar di e suma pa fin di Mei, y mitar di e suma pa fin di Juni. E no ta obligatorio, pero e ta yuda esnan cu tin presupuesto preta pa asina haci e pago den dos luna, envez di hisa benta tur pago fin di Juni.
El a bisa cu esnan cu no a paga ainda, e grupo aki ya caba a haya un naheffing aanslag na Februari cu 50% di boet di e prome mitar di aña. Si e grupo aki no bay paga atrobe pa di 2ndo mitar di aña, nan lo bolbe bay haya un naheffing aanslag di 50% di boet riba e suma habri, y esey ta un gasto cu no ta necesario.
