Ta desea tambe mihor comunicacion cu prensa
ORANJESTAD (AAN): Durante presentacion di e rapport annual di Corte Comun, presidente Mauritsz de Kort a indica cu e meta di e bestuur nobo ta pa hof bira mas profesional, pa asina atende mihor ainda cu casonan pa sirbi comunidad.
Mas profesional riba tur area, pa bin cu mehoracionnan structural.
Segun de Kort, e enfoke pa e aña cu ta bin ta un mehoracion den hurisprudencia mes.
“Internamente nos ta yama esaki re-orientacion riba e proceso primario”.
Nos ta traha na un manera horizontal, pero den e añanan cu ta bin nos kier bay traha mas manera team, segun de Kort.
Pa loke ta e comunicacion cu prensa tin cu corte, de Kort a indica cu su deseo ta pa esaki bira mihor y mas profesional.
El a tuma tempo pa splica dicon e comunicacion por ta asina importante.
E presidente di Corte Comun a duna como ehempel un caso di WEB, unda cu WEB a bay prensa pa duna di conoce cu e compania a apela un caso, pero despues di basta tempo ainda e caso no a wordo trata.
Pa casualidad un colega di de Kort a mira e articulo ey den prensa y asina corte a ripara cu di berdad algo a bay robez cu e caso.
“Ora cu e caso a wordo transpasa di Aruba pa bay pa e combinacion di apelacion, esta e tres hueznan na Corsow, e traspaso no a bay bon, pues nos a perde e caso for di bista”.
E ora ey nos a busca tur e documentonan (digital) bek y awor e caso a wordo apunta na un combinacion di tres huez, pa asina e caso wordo trata mas lihe posibel, segun e presidente di Corte Comun.
De Kort ta puntra dicon a duna solamente WEB e oportunidad di papia riba e hecho cu apelacion ta tardando, sin despues tuma contacto cu corte pa haya sa nan banda.
Si esey lo a tuma lugar, mas lihe ainda corte lo a haya sa cu e tardanza a wordo ocasiona pa un error den e sistema di corte.
“Por a yama nos via nos huez di prensa por ehempel”, segun de Kort, kende a admiti si cu den e caso aki e tardanza di berdad tabata un fout di corte mes.
