Esnan cu abono mensual tin di staciona den zonanan indica pa letter

Debi cu a elimina hokinan geel...

ORANJESTAD (AAN): E cambio cu Aruparking a introduci pa 2023 ta cu nan a elimina tur hoki geel, y a converti nan tur den hoki blanco.  Esey nifica cu lo tin mas espacio pa publico staciona.

   Y esnan cu lo paga pa abono, por sigui staciona unda cu ta.  Tur esey ta hinca den e sistema nobo cu Aruparking ta introduci.  Pero tene cuenta cu lo bay introduci zona cu un borchi color oranje cu un letter riba dje.

   Ora cu bo abona pa parkeo mensual, lo bo haya indicacion ta den cual zona bo mag di staciona.  Pues si acaso abo haya Zona K pa staciona (zona di Lagoen), bo mag di staciona den cualkier hoki blanco, pero tanten cu e ta den bo zona.  Pues bo no mag di bay staciona den otro zona di otro letter.

   Companianan di Delivery: Companianan cu tin Truck of Van di Delivery cu tin di bay staciona djis un rato pa sea hisa of baha carga, tambe por pidi un permiso di BPV for di Aruparking.

   Aruparking ta funciona di 9:00 am te cu 7:00 pm, y esnan cu tin vehiculo di Delivery ta ser pidi pa acudi na e oficina pa busca un permiso special di BPV, esta ‘Bijzondere Parkeer Vergunning’.  Esaki ta pa tur compania cu ta haci entrega na negoshinan estableci den centro di ciudad.

   Drentando den contacto cu Aruparking y pagando 105 Florin pa luna, e vehiculonan aki di entrega por bin na remarke pa haya un BPV y haci delivery usando brevemente e hokinan blanco aki.

   E ta un permiso cu ta hopi util pa no djis compania di entrega, sino personanan tambe cu tin necesidad di haci bishitanan cortico cerca clientenan den centro di ciudad.  Tur informacion di esaki ta poni ampliamente riba e website di Aruparking.