E caso ta wordo studia
CARACAS: Informe di ciudad di Boconó na estado Trujillo ta indica cu e conocido docente di musica, Roberto Mejía a wordo diagnostica cu cancer di weso den su dijbeen banda drechi, y esaki a afecta su heup y a cuminza trece su bida na peligro, pero segun e docente y su famia, el a wordo cura completamente pa un milagro cu nan ta bisa ta danki na e asina yama Docternan di Pober.
Despues di varios luna di tratamento pa combati e tumor di cual Mejía tabata sufri di dje, tambe a haci hopi oracion pa e por a soporta e dolor no djis fisico, pero tambe emocional, cu el a sinti ora el a descubri cu celnan canceroso a wordo activa den su wesonan, y e consecuencianan cu esaki lo trece p’e y su famia.
Pero awor den su consulta medico di mas recien na ciudad di Caracas, segun su famia y prensa local, a mira claramente cu e cancer a desaparece, algo cientificamente inexplicable pa su Docter, kende a hasta “mand’e bolbe haci testnan di MRI y otro test medico pa asina por haya un motibo pa su recuperacion milagroso.”
E momento ey ora e tabata wordo confronta cune cu e resultadonan di testnan na e Consultorio di Docter, e ora e musico a confesa loke a socede cune aña pasa November den oranan di marduga, ora cu e ta insisti cu el a wordo bishita pa Dr. José Gregorio Hernández.
“Mi tabata drumi, ora cu diripiente mi a sinti cu e porta di camber a habri ora scharnier a kraak, y un homber a drenta cu a cende luz, a pone su sombre riba e mesa cu spiel, y di un saco el a saca un bata blanco y a bisti esey. Despues el a puntrami unda ta haci dolor, y el a cuminza revisami. El a puntrami di e tratamento cu mi ta tumando y a bisami pa mi sigui cune, pa sigui resa Credo y oracion na Curazon di Hesus. El a dunami bendicion y el a bay,” Roberto a conta su Docter.
E caso aki a wordo pasa pa otro estudionan, tanto cientifico como di misa, pa agrega e testimonio aki na e causa pa canonizacion di Beato José Gregorio Hernández pa e wordo declara como ‘Santo’.
Mientras tanto, Roberto Mejia meymey di su recuperacion ta hopi contento pa e fabornan ricibi y ta contando tur hende su storia como un fiel creyente di Dr. José Gregorio Hernández. Y aki por mire ya ta cuminza cana bek.
