ORANJESTAD (AAN): Chris Goedhart, Beleidsmedewerker na Departamento di Salud (DVG) y envolvi cu e programa di vacunacion a splica e rason importante pakico Vacuna contra Covid-19.
Ta asina cu awe 2 di December e vacunacion y e 'booster shot' pa personanan riba 60 aña di edad ta continua. E biaha aki na e diferente MFAnan rond di Aruba.
Goedhart a laga sa cu e 'booster shot' ta importante pasobra ta wak den tempo cu e efectividad di e prome y di dos vacuna di Pfizer ta baha.
Ta importante pa despues di 6 luna cu un persona a haya su di dos 'shot' pa e haya e 'booster' pa asina haya su proteccion bek, a remarca.
Aworaki tur persona cu tin 60 aña bay ariba ta bin na remarca pa e 'booster shot' y cu a haya e dos vacuna anterior. Tambe ta bin na remarca e personal cu ta traha den cuido cu tin contacto directo cu pashentnan.
Ta spera cu den futuro e grupo aki ta bira mas grandi, segun Chris Goedhart.
El a sigui bisa cu tur persona 60 aña bay ariba, den siman, DVG ta bay yama nan pa bay 'prik', sea na DVG of un otro localidad.
E personanan cu ainda no ta vacuna, di 12 aña bay ariba, ta keda sumamente importante pa haya e vacuna hasta si nan tin e dos vacunanan di Pfizer.
El a agrega cu ta importante cu un persona cu a haya Covid-19 despues di su di dos vacuna, cu e mester warda 6 luna despues cu el a test positivo pa haya su 'booster'. E infeccion di Covid-19 ta un tipo di 'booster' caba. Pesey mester warda 6 luna despues di e infeccion pa bin na remarke pa haya e 'booster shot'.
Finalmente, Chris Goedhart a haci un invitacion na esnan 60 aña bay ariba pa bay vacuna pasobra ta hopi importante pa sigui haya un proteccion halto contra e virus.
