Mike Petronia: *Ainda ningun reunion a tuma lugar den Parlamento tocante e topico
ORANJESTAD (AAN): Mike Petronia for di basta luna ta ocupa ta busca husticia pa su yiu muher Sayuri, kende alrededor di 5 luna pasa a wordo asesina.
Polis a detene dos sospechoso y Petronia ta teme cu nan lo haya un castigo demasiado abao, entre otro debi na e hecho cu nan ta menor di edad.
Petronia ta boga pa bin cambionan di ley pa aumenta e castigonan duna pa posesion di arma di candela y pa asesinato entre otro.
Pesey el a acerca politiconan tambe for di lunanan atras y el a indica cu na dado momento parlamentario e tempo ey Alan Howell a manda un carta pa pidi presidente di Parlamento di e tempo ey Ady Thijsen pa yama un reunion riba e topico.
Petronia a splica cu e carta a wordo firma pa Howell, pa Rocco Tjon y Marlon Sneek, pero e reunion nunca a wordo yama.
“Nos tin problema di arma di candela na Aruba toch?”.
Siman pasa tabata tin un caso di tiramento dilanti di Well Well y nan no ta poniendo atencion riba e problematica aki cu ta uno grandi, segun Petronia.
El a indica cu parlamentario Mike de Meza riba 9 di November a manda un carta atrobe pa yama e reunion, pero te aworaki e presidente actual di Parlamento Edgard Vrolijk no a yama e reunion.
“E problema di arma na Aruba no ta wordo ataca y mi ta sinti cu Parlamento di Aruba ta drumi, paso peticionnan ta wordo haci, pero ningun reunion riba e topico aki ta tuma lugar”.
Mi no kier pa e pasa, pero mi ta sigur cu ora cu e toca na nan famianan, e ora ey si reunionnan lo wordo yama.
Mi ta akinan no pa mi yiu so pasobra mi a perde mi yiu caba, pero awe ta mi yiu y mañan e por ta yiu di cualkier un di nos, segun Petronia, kende a sigui bisa cu e ta sinti cu e problema aki di arma mester wordo tuma na serio.
“Ningun politico a yamami ainda pa papia riba e asunto aki”.
Casi tur siman mi ta cu prensa, mi ta tur dia riba Facebook y bezig y ningun politico a yamami.
Nan ta yama varios otro hende pa diferente asunto, pero ami Mike Petronia tocante e problema di arma di candela no a wordo yama ningun momento.
"Mi ta yora y sclama envano", Petronia a sigui bisa.
