Temperatura a subi rond mundo pa adverti pa cambio peligroso di clima --- *Comunidad Amish na Merca ta inspira mundo cu metodonan basico --- *Crisis di Ukraine ta stroba atencion pa crisis mundial hopi serio
ORANJESTAD(AAN)- E resultadonan cu Omicron y e crisis di Ukraine tabata tin pa mundo, a presenta na momento cu mundo mester a cuminsa traha riba solucionnan concreto pa cantidad di problema.
Central den e problemanan aki, ta produccion di energia den e plan mundial pa baha y finalmente deshaci di uzo di carbon, petroleo y gas.
E situacion produci pa Omicron, cu a afecta mundo na momento cu a pensa cu Covid-19 lo a pasa pa pasado, a haci cu por ehempel na Europa, a cuminsa papia di e posibilidad pa pone gas bon procesa riba e lista di energia limpi.
Ukraine a kita e tema for di atencion mundial, cu ta dirigi riba e instabilidad enorme cu solamente un menasa di un posibilidad creciente di guera mundial, por produci.
Ta deber di DIARIO, sinembargo, sigui traha riba e tema di cambio di clima basa riba e resultadonan sumamente grandi cu un cambio incontrola di clima por tin pa Aruba.
Pa loke ta trata Aruba, atencion di DIARIO ta keda dirigi riba e proyecto di Quanten, debi na e hecho cu e compania Mericano ta duna conseho pa proyectonan den generacion alternativo di coriente manera pa medio di kima sushi.
Den e proceso aki, sushi ta wordo kima y ta produci e aire cayente cu ta transforma awa den vapor, cu por uza pa genera coriente.
Naturaleza a beneficia Aruba cu factornan cu mundo ta reconoce como fuente importante pa generacion alternativa di coriente, segun procesonan cu mundo tabata uza den pasado.
Pa mira si ta berdad cu un comunidad por biba di energia alternativa, DIARIO a indaga riba e forma cu comunidad Amish ta atende cu coriente te awe.
E miembronan di comunidad Amish na Merca a huy di persecucion religioso na Europa durante siglo 18 y a establece nan mes tambe na Merca.
Na Siglo 20, ora mundo a cuminsa studia con por genera energia sin uza carbon, petroleo y gas, e grupo aki a haya hopi atencion.
Un bishita na un comunidad Amish ta confronta mundo cu un comunidad di ayera, pero ta inspira pa solucionnan cu awe mundo ta busca pa cantidad di problema.
Ainda cabay ta base di nan transportacion, pero na nan forma nan a logra substitui coriente produci pa plantanan grandi, cu segun e grupo lo a uni nan na partinan di comunidad cu cual nan no ta di acuerdo a base di nan religion.
Fascinante ta e forma cu e energia di biento, awa y solo ta wordo uza pa genera coriente cu awe ta permiti uzo di aparatonan, pero na forma limita.
Nan tin telefon mobil, cu no ta cay den man di muchanan pasobra e telefonnan no ta drenta cas.
E menasa di guera mundial ta sigui exigi atencion practicamente total. Den e situacion aki, sinembargo, buskeda di energia alternativa ta continua.
Hulanda siman pasa a atende cu su produccion di energia di solo cu instalacionnan riba lama.
Esaki ta trece nos atrobe na Aruba rondona pa lama, cu ta uno di e fuentenan mas grandi di energia solar y di awa. Setenta porciento di mundo ta lama, cu ta capta rayo di solo.
E movecion di lama tambe ta produci energia pa no papia mes di biento.
E comunidad Amish cu ta wordo considera “estilo bieu” ta biba cu energia di bateria, di generador chikito cu ta uza gas.
E futuro di coriente no ta asunto solamente di Gobierno. Mester atende cu mentalidad y mester prepara Pueblo pa un realidad.
Tempo di consumo sin preocupacion, pa henter mundo a pasa pa pasado. Mester recupera situacion financiero pero tambe naturalesapa evita desastre cu no tin placa pa remedia.
Baha gasto di coriente y traha riba futuro ta sumamente importante y lo afecta riba tur tereno hasta riba salud mental di hobennan, cu segun estudio ta bira victima di teatronan di pelicula riba pantayanan grandi na cas of riba nan telefon.
Rescate di naturalesa y clima, tin un rescate di hende como hende tambe y ta proteha tambe contra e menasa creciente di desastrenan natural.
