Pa pueblo ta bon informa
ORANJESTAD (AAN)- Un tema di cual poco, pa no bisa nada, ta bin dilanti como informacion, ta e hecho cu despues di a ricibi Radioterapia, e pashent no por haci test di sanger (saca sanger den laboratorio), den e braza concerni; tampoco midi su presion arterial, ni haci ningun sorto di test den e braza unda a ricibi Radioterapia.
Hopi kier sa pakico e ta asina: Esaki ta un informacion cu tur pashent cu ta pasa den e proceso di Radioterapia mester tin, y ta deber di e specialista of su docter di cas pa lag’e sa.
Matutino DIARIO a haci e pregunta aki na un specialista, ken a splica nos cu esaki ta pasobra Radioterapia ta daña cel y tehido, causando inflamacion, debilidad, endurecimento, y riesgo na haya Linfedema (inflamacion door di mal circulacion linfatico) den e brasa, locual ta rekeri di cuido extremo pa evita mas trauma, infeccion, of procedimentonan invasivo, precisamente test di sanger of tumamento di presion) den e banda concerni, p’asina evita y preveni complicacion.
Segun e specialista a splica e radiacion, maske cu e ta dirigi na un cancer, ta afecta e tehidonan sano cercano, ta daña e nervionan y adernan, causando dolor, rigidez. Y debilidad na largo plazo, entre otro efectonan cu DIARIO lo menciona den otro articulo. Esaki no ta un medida temporal, ta algo cu e pashent mester tene cuenta cu ne pa resto di su existencia.
