ORANJESTAD (AAN): Canasta Basico no ta solamente y simplemente un lista di prijs. Mas bien, e ta un pilar silencioso di stabilidad economico.
Maneha pa e Departamento di Asuntonan Economico, Comercio y Industria (Deaci), Canasta Basico ta garantisa cu productonan esencial ta keda accesibel pa tur famia, hasta ora cu e mercado mundial ta cambia.
E forsa principal di Canasta Basico ta proteccion. Door di establece prijsnan maximo riba articulo esencial manera aros, lechi, hariña, productonan di hygiene y productonan esencial di baby, e sistema aki ta protehe hogarnan di e shock di aumento di prijs. Cu e vigilancia di Departamento DEACI, supermercadonan ta obliga di mantene prijsnan husto pa evita abuso excesivo di prijs riba productonan basico.
Un otro balor agrega di Canasta Basico ta, stabilidad. Ora cu prijsnan di productonan esencial ta permanence fiho y constant, famianan por planea miho, presupuesta y ta biba cu menos presion financiero. E ekilibrio aki ta wordo sinti pa henter comunidad: scolnan, lugarnan di cuido y gruponan vulnerabel ta beneficia di e stabilidad cu Canasta Basico ta crea.
Si gobierno dicidi pa elimina e sistema aki, Aruba ta perde e proteccion y stabilidad aki di un dia pa otro. Prijsnan riba productonan esencial por subi lihe, cu lo afecta famianan mas vulnerabel y cu entrada abou. Canasta Basico por ta algo simpel, pero su impacto ta grandi. E ta un escudo cu ta proteha e pueblo y ta garantisa stabilidad den bida diario.
