Esaki ta e ‘Vision pa Pariba’ con San Nicolas lo bay ta den futuro  

Documento extenso traha door di SNBA

ORANJESTAD (AAN): Loke por mira riba e potret aki, ta e ‘Vision pa Pariba’ cu ta poni den un documento produci door di San Nicolas Business Association.  E ta duna un relato breve di San Nicolas den su tempo di gloria, y ta splica tur e aspecto di e vision aki, cu ta un continuacion di nan ‘National Transportation map’.

   Loke por mira den e ideanan aki, ta cu nan kier empuha San Nicolas fuertemente, pero alavez keda mantene su herencia, cultura, musica, cuminda cu ta di e Arubiano, y esnan cu a contribui na e exito di e isla.

   Como cu Aruba a enfoca awor riba turismo como su pilar economico principal, tin di corda cu tin di pensa pa esaki keda produci ganashi, pero e ta haci e isla vulnerabel na fluctuacion economico global, pandemia, y riesgonan relaciona cu clima.

   Pesey SNBA ta pensa cu tin di sigui diversificacion economico door di reduci dependencia riba crecimento di turismo y empuha crecimento den otro sectornan.  Den e contexto aki, e focus mester enfoca riba e potencial economico di San Nicolas cu ainda no a wordo explota.  San Nicolas pa gran parti di historia tabata un region significante pero no a wordo uza na su maximo.

   Un componente principal di e strategia aki ta envolvi revitaliza San Nicolas.  Cu su waf y ex-tereno di refineria, e area tin un promesa tremendo pa atrae inversion, generando crecimento, y avanza desaroyo sostenibel tur rond di e isla.

   Puntonan di accion: Esaki ta e puntonan di accion pa e area di centro di San Nicolas.

(1) Revitaliza e caya principal di centro di San Nicolas pa atrae mas Café y Restaurant cu ta representa e paisnan Caribense situa den e parti aki di e isla.  Complementa e zona cu tiendanan familiar pa enriquece e experiencia general.

(2) Completa e Carnival Village, sigura cu e ta inclui amenidadnan esencial manera un escenario, sistema di sonido, camerin, greenroom patras di stage, y un area di prensa.

(3) Promove e uzo di 70 mil meter cuadra di tereno di e refineria pazuid di Carnival Village pa uzo como parkeo, museo, espacio comercial, y un Zona di Comecio Exterior.

(4) Restablece e incentivonan fiscal pa atrae empresanan pa e zona di caya principal den centro.

(5) Uza bek edificionan abandona pa crea oportunidadnan pa desaroyonan comercial nobo of desaroyonan residencial.

(6) Reorganiza e zona di entretenimento pa adulto y asina integre mihor cu e sector urbano di e area.

(7) Evalua e museonan existente pa su posibel mudamento y introduci conceptonan nobo, manera museonan dedica na carnaval, historia, y refineria industrial, cu e meta pa mehora e oferta cultural y educativo di e ciudad.

(8) Crea e festival yama ‘Aruba Music Heritage and Cultural Festival’ (AMHCF) pa celebra e legado musical di e isla.

(9) Considera pa duna un permiso di Casino pa San Nicolas, acompaña di un permiso cu no mester di tin tanto camber di hotel pa por habri uno.

(10) Apoya e fundacion Aruba Amenities Foundation (AAF) den su esfuerzonan pa preserva y promove historia y patrimonio di e refineria.

(11) Crea un Sunrise Development Foundation pa supervisa y coordina tur e proyectonan na San Nicolas y e distritonan rond di dje.

   Den siguiente edicionnan DIARIO lo bin cu mas detaye di e fenomenal “Vision pa Pariba” aki di SNBA.