Rubiella Toppenberg di FADA:
ORANJESTAD (AAN) -- Rubiella Toppenberg, Trahado Preventivo di Fundacion Anti-Droga Aruba (FADA), a menciona na Matutino DIARIO: “Awe, no simplemente nos ta lanzando un campaña, sino cu nos ta lanzando un movimento awe. E Campaña BAR (Bo Amigo Responsabel) a cuminza oficialmente pa nos awe, y concientemente, nos a scoge e temporada aki di carnaval; nos sa cu e temporada aki ta di hopi celebracion, hopi gozo y alegria, pero nos mester ta conciente tambe cu durante e temporada aki, tambe tin e parti di tristeza unda cu tin accidente. Tin hopi persona cu ta maneha na momento cu nan ta uza substancia, y pa nos ta sumamente importante pa sigui trece concientizacion pa por sigui evita esaki”, Rubiella Toppenberg a señala.
El a sigui bisa cu na momento cu un persona ta scoge pa maneha, anto el a bebe alcohol, e ta un escogencia propio, y FADA ta kere cu esaki por wordo evita y esey ta e meta tras di BAR tambe.
“Tristemente nos tur sa con e aña a cuminza, cu un accidente cu a trece impacto den comunidad, ta continua y ta sigui pasa, apesar di e idea cu nos kier sigui purba riba concientizacion, pasobra na final di dia un decision por cambia tur cos”, Rubiella Toppenberg a trece dilanti.
BAR ta existi desde aña pasa, nos a lant’e durante temporada di carnaval, y FADA ta hopi contento di por bolbe trece e mensahe aki, durante carnaval.
“BAR ta para pa ‘Bo Amigo Responsabel’ y esaki, eigenlijk, nos kier sigui hiba eyfo tambe. Pa BAR e aña aki nos a dicidi di uni cu Piso 3. Nos ta kere firmemente den Piso su strategia, su forma di traha. Den pasado nos a traha cu Piso den diferente proyecto, y nos por bisa cu esakinan tabata proyectonan exitoso, y e aña aki nan na uni nos pa loke ta BAR”.
Toppenberg a señala cu pa prome biaha den historia FADA ta bay crea algo grandi. E aña aki nos tin tres compania di seguro renombra y grandi, cu aña tras aña ta duna sosten na carnaval di Aruba, y e aña aki nan ta uni nan mes na un solo causa nacional pa sigui trece concientizacion riba loke ta no maneha na momento cu bo ta bay consumi alcohol”, Rubiella Toppenberg a duna di conoce.
