Esaki ta e habilidadnan importante pa exito na scol

Fundacion Pa Nos Muchanan - No ta mucho laat ni mucho trempan pa yuda bo yiu desaroya abilidadnan p’e logra den su carera na scol.

Ta un combinacion di abilidadnan manera, ta organiza, por maneha tempo, pone prioridad, concentra y ta motiva, ta yuda pa logra durante temporada di scol.

   Mirando cu scol ta casi cuminsa atrobe, aki Hubentud den Movecion y Fundacion Pa Nos Muchanan ta sigui algun sugerencia cu por yuda bo yiu riba e bon paso.
   Papia cu bo yiu:  Den combersacion bo ta haya sa e abilidadnan cu bo yiu tin y tambe otro abilidadnan cu e mester desaroya mas aleu. Puntr’e pa su vaknan preferi, y esnan menos gusta y si e ta satisfecho cu e manera cu e ta siña.

   Scucha bon pa bo haya pista:  Pone loke bo ripara hunto cu loke bo yiu ta bisa bo. E ta sintie manera tapa bou di e cantidad di huiswerk? Kisas e tin problema pa maneha su tempo. E tin problema pa completa su huiswerk? Porta tin cosnan ta distrai e facilmente.  Bo yiu no ta interesa den scol? Porta e mester haya algo pa motiv’e?

   Haya sa unda tin problema: Check e siguiente area di abilidad unda bo yiu por tin problema.

  (1) E forma con e ta organiza su cosnan
Pa por logra tambe na scol un mucha mester ta organiza, sea esaki ta pa ora e mester busca informacion pa un vak of ora e mester corda pa e trece su lunchbox cas.

   Sugerencia pa yuda bo yiu desaroya su abilidad pa organiza su cosnan:

(*) Skirbi un lista di loke bo yiu mester hiba scol y trece cas tur dia. Pone un copia na un porta na cas y uno den su tas. Check regular si el a corda e puntonan.

(*) Check con bo yiu ta nota su huiswerk y con e ta organiza su schriftnan. Despues hunto traha un sistema cu e kier sigui uza.

  (*) Hunto cu bo yiu haci compra di materialnan cu e ta yud’e organiza su cosnan, manera etui, map, agenda, etc.

  (2) Maneho di tempo
Por ta dificil pa bo yiu siña planea suficiente tempo pa completa un tarea. Hopi biaha sa pasa cu aunke tin un siman prome cu un proyecto mester ta cla, tin mucha ta cuminsa traha riba dje hasta un dia prome. Siña organiza tempo den oranan productivo ta rekeri practica y experencia.
   Algun sugerencia pa yuda bo yiu maneha su tempo:

(*) Ta marca riba un calender e tareanan cu bo yiu ta haya. Pa e tareanan grandi ta cuminsa marca di patras bin padilanti for di e fecha cu e mester ta cla y ta parti e den tareanan chikito cu e ta haci cierto dia.

(*) Yuda bo yiu nota e tempo cu tur siman e ta hinca den huiswerk. Asina e por haya sa con pa reparti su tempo miho.

(*) Palabra hunto e ora di haci huiswerk y yuda bo yiu mantene na e palabracion aki.

(*) Si e oranan den siman no ta suficiente yuda bo yiu busca otro ora, manera den weekend.

  (3) Pone prioridad:
   Tin ora tin mucha ta cay atras na scol y no ta logra entrega nan huiswerk pasobra nan no sa unda pa cuminsa. Pone prioridad na cierto tareanan ta un abilidad cu bo yiu mester den bida. Pesey nunca ta laat pa cuminsa.
Algun sugerencia pa siña bo yiu e abilidad di pone prioridad:

(*) Puntra bo yiu pa skirbi tur e cosnan cu e mester haci, hasta e cosnan cu no tin di haci cu scol

(*) Pidi’e marca cada tarea cu un etiket y pone un cifra riba dje di 1 te cu 3. 1 mester ta esun mas importante.

(*) Puntr’e informacion di cada tarea, p’asina bo por comprende su prioridadnan. Si e marca tur su actividad cu 1, e ora bo sa unda su atencion ta concentra.

(*) Yuda bo yiu haci cambio den e etiketnan. Asina e ta siña con pa traha cu prioridad. Sugeri pa e bolbe skirbi e lista y pone tur esnan cu ta 1 mas na halto.

(*) Check e lista regularmente y wak con e ta prioretisa su tareanan nobo.

  (4) Concentracion
Sea bo yiu ta practica con pa pone letter den secuencia corecto (spellen) of e ta siñando pa un proefwerk, ta importante p’e haci su huiswerk den un luga cu no tin distraicion y interupcion.
Tips pa yuda bo yiu concentra:

(*) Si bo yiu tin cu uza computer pa haci su tarea, kita e aceso na website nan di social media y wega.

(*) Pone limite na uzo di telefon y wak television

(*) Busca un luga cu ta cuadra cu e tarea. Si bo yiu ta traha riba un proyecto, e lo tin mester di basta espacio rond di dje. Si ta pa un proefwerk e mester di un lugar cu ta bon ilumina, ventila y poco distraicion.

(*) Yuda bo yiu concentra door di tene separa di su otro rumannan.

  (5) Motivacion

Mucha kier siña y bay bon na scol. Tin biaha pa falta di entre otro motivacion nan no ta logra e nivel necesario pa por ta exitoso

Algun sugerencia pa motiva bo yiu:

(*) Conecta e lesnan di scol na e bida di bo yiu. Si e ta siña tocante percentahe, puntr’e pa conta e prijs di un producto rebaha den tienda ora boso bay haci compra.

(*) Conecta interes di bo yiu na siñamento. Si e ta gusta musica, dun’e buki tocante musiconan y mustr’e e conexion entre musica y idioma stranhero.

(*) Duna bo yiu control y scohencia. Cu bo guia, lag’e fiha su ora di siña, su sistema pa organiza su cosnan y su topico di proyecto/spreekbeurt.

(*) Encurasha bo yiu p’e comparti su experencia. Reguralmente puntr’e di loke el a siña na scol.

(*) Felicita bo yiu, encurasha e y celebra tur su exitonan.

   Hopi biaha miedo ta wanta mucha atras pa no purba. Miedo pa faya of e experiencia di un biaha cu el a faya. Bo por kibra e ciclo aki door di celebra su exitonan, sin importa con chikito nan ta. Y door di dun’e oportunidad pa e mes logra  na scol.

   Fuente di articulo: “Five key skills for academic success”-GreatSchools.  Esnan cu kier mas informacion of pregunta por acerca Fundacion Pa Nos Muchanan na Cumana 2.