BOGOTA: Famianan ta bisando un cos so! E empresaria aki a bira “loco totalmente”. Pero esey ta algo cu e dama Yina Calderón no ta haci mucho caso di dje.
E ta un influencer cu a bira conoci pa su participacion den ‘Protagonistas’ di un programa di TV na Colombia. Y awor riba Social Media, e ta crea contenido y semper su forma mes ta algo controversial.
Recientemente e dama aki procedente di departamento di Huila na Colombia, a bisa su fanaticonan riba su account di Instagram cu e lo bay converti su mes den e “prome Barbie Colombiano”.
“Mi gusta popchinan Barbie for di tempo mi ta mucha, y pesey mi a tuma e decision di transforma mi mes den un popchi di berdad. E prome na Colombia, e Barbie humano colombiana,” el a bisa riba un video cu el a pone riba social media. Riba e video bo por mire rondona pa numeroso Barbie.
El a sigui bisa, cu pa e converti su mes den e prototipo ideal di popchi, e mester bay haci 10 cirugia plastico, entre nan ta e kitamento di su ‘ribchinan flotante’, implante na su heup, coreccion di nanishi, cambia su protesisnan den su pecho, cambia e contour di su cara, un procedimento pa cueronan. E operacion lo ser haci riba Diamars.
“Nan ta casi 10 cirugia na mesun momento, y aki mi lo kita mi ribchinan flotante. Mi ta compronde e punto di bista di tur hende, pero e ta mi decision y ohala cu boso por acompañami den e proceso aki,” el a skirbi.
SU FAMIA:
Mientras tanto Yina a activa riba su Instagram e opcion pa haci pregunta pa asina su fanaticonan puntr’e riba kico cu ta. Y aki ta unda un hende a puntre, kico su famia ta pensa riba e decision pa bay den sala di operacion pa haci 10 cirugia diferente.
Yina a responsa: “Nan tin un tiki incertidumbre pasobra no ta normal cu un hende ta bay kita dos ribchi flotante, y segun nan, ami a bira totalmente loco, pero mi ta confia den Dios cu tur cos lo bay sali bon”.
Tambe el a probecha pa contesta e pregunta, pa sa kende lo bay acompañe durante e dia largo di operacion aki. “Mi ta bay cu mi prima, pasobra e ta esun cu ta yudami na cas, y e ta cushina bon soppi. Mi ta bay tambe cu mi chauffeur cu ta mi padrino.”
CAMBIO RADICAL:
E prome participacion di Yina Calderón den e show “Protagonistas” di RCN tabata na 2013, ora cu e tabatin 22 aña. For di e tempo ey, su nomber por a wordo scucha varios biaha na Colombia y su personalidad a bira conoci.
E tempo aya, su aspecto fisico tabata totalmente diferente di loke e ta awendia.
E ‘influencer’ a pasa den man di diferente Ciruhano Plastico pa e mustra diferente y un di e cirugianan cu el a haci tabata na su bilnan. Pa colmo algun luna pasa e mester a haci un operacion nobo pa saca biopolymernan cu tabata afectando su salud.
Su nanishi, barica y cara en general ta otro compara cu partinan di su curpa cu el a laga retouch.
