Director di Aduana Ricky Croes pa tur cu ta bay cu vakantie afo:
ORANJESTAD (AAN) Matutino DIARIO a acerca señor Roderick Croes, Director di Servicio di Aduana, relaciona cu e exoneracion di impuesto riba cierto producto cu e persona cu ta bay cu vakantie afo, ta trece cu ne ora e bolbe drenta Aruba.
Señor Croes a splica cu manera ta custumber, den temporada di vakantie Aduana ta saca un comunicado recordando tur vacacionista riba nan derecho, na momento di Aruba bolbe for di vakantie, y cu ta exoneracion di impuesto riba cierto productonan, cu nan ta trece cu nan.
“E derecho aki ta ancra den tratadonan y reglanan internacional, como tambe nacional. E derechonan aki ta como lo siguiente: articulo of producto cumpra den exterior, cu tin un balor di menos di 900 florin y esaki ta conta pa cada persona den e famia. E suma di exoneracion aki, nos por corda cu antes tabata 400 florin, pero en bista cu prijsnan na mundo a subi, pero tambe pa nos ta den concordancia cu, por ehemplo, Bonaire, e montante pa cual ricibi exoneracion a wordo cambia pa 900 florin, y e cambio aki a drenta na vigor dia 1 di April 2024. Pues nos tin mas of menos un aña y mey caba, ta teniendo e suma aki como esun cu por ricibi exoneracion riba dje”, director di Aduana a señala.
El a agrega cu pa loke ta trata bebidanan alcoholico, e exoneracion ta pa un liter di alcohol destila of 2.25 liter di biña, of 3 liter di cerbes. Y esaki ta conta pa personanan den edad riba 16 aña.
“Pa locual ta trata e productonan cu ta contene tabaco, e exoneracion ta pa 200 pida cigaria. Esaki ta ekivalente na un slof di cigaria. E ta of 25 ciga, of 50 cigaria of 250 gram di tabaco. Esaki tambe ta conta pa, solamente, pa personanan den edad riba 16 aña. Pa cierto productonan manera remedi, mata, carni, lo mester di permiso di e instancia concerni si e productonan a wordo importa”, señor Roderick Croes, director di Aduana.
El a remarca cu tur locual ta excede e balor of e cantidad permiti, riba dje si mester paga invoerrechten of accijns. “Por ultimo, mi ta pidi comunidad pa respeta e ley aki, como tambe e trabao di nos ambtenaarnan cu ta eherce nan trabao debidamente, cumpliendo cu ley. Mi ta pidi boso pa haci e declaracionnan debido, pa tur locual bo por tin den bo maleta cu ta surpasa e suma of e cantidad permiti, y tambe paga derechonan riba esakinan”, señor Ricky Croes, director di Aduana a reitera y enfatiza.
