ORANJESTAD (AAN): Diabierna atardi, a tuma luga un ceremonia special na Instituto Coreccional Aruba, KIA,
unda a haci entrega di diploma na varios personal cu a sigui opleidingnan importante pa nan trabao den KIA.
Den presencia di Minister di Husticia, mr. drs. Arthur Dowers, direcor di KIA Sr. Erik Teepe, speurhondentrainer certifica di Aduana Sr. Giovanni Nicolaas y varios colega di Dienst Gevangeniswezen Aruba, a haci entrega di e merecido diploma na e personal, pa nan esfuerso y dedicacion.
Un total di 13 empleado a gradua di e Vervolg Opleiding 1, mientras cu 14 empleado a gradua exitosamente di Vervolg Opleiding 2. E formacion aki ta parti di e trayecto continuo di desaroyo profesional pa e personal di KIA.
Ademas, 6 miembro di personal a haya nan diploma pa e formacion MBO-3 pa Sociaal Pedagogisch Werker na instituto FEPA, un logro cu ta demostra nan compromiso pa sigui desaroya nan mes.
Un otro momento di orguyo durante e celebracion tabata e certificacion oficial di un speurhondengeleider y su dos cachonan, Renzo y Hector, cu despues di entrenamento intensivo di 4 luna bao di guia di Sr. Giovanni Nicolaas di Aduana, a logra pasa e curso exitosamente.
Minister di Husticia Dowers, hunto cu e cuerpo di DGWA, ta felicita tur empleado cu a gradua y ta expresa nan gratitud y respet pa nan esfuerso. Cu esaki, Ministerio di Husticia ta enfatisa cu e posibilidad pa sigui formacion profesional no mester ta limita solamente na e funcion actual di e empleado, sino pa habri espacio pa crecemento y carera den e servicio publico.
Ministerio di Histicia ta sigui inverti den e futuro di su personal, y e resultado ta evidente: trahadornan capacita y prepara pa sirbi e comunidad cu dedicacion y profesionalismo, apesar di e situacion di deterioro di e facilidad coreccional.
