ORANJESTAD (AAN): Bucuti & Tara Beach Resort, e resort exclusivo pa adulto, ta orguyoso di a wordo reconoci un biaha mas den e Travel + Leisure 2025 World’s Best Awards.
Como e unico resort Arubano nomina entre e Top 25 Resorts den Caribe, Bermuda y Bahamas, Bucuti & Tara ta sumamente honra pa representa Aruba y ta mantene su compromiso pa crea experiencia cu tin balor profundo, cu hospitalidad refina y autentico di nos isla.
“Durante 30 aña, lectornan di Travel + Leisure a pone un spotlight riba e experiencianan di biahe mas memorabel rond di mundo,” Crescenzia Biemans , Chief Corporate Officer di Bucuti & Tara Beach Resort a conta. “Pa wordo reconoci consistentemente entre e mihornan na mundo ta un reflexion di e dedicacion di nos Bucuti Team pa ofrece autenticidad, luho sostenibel y un ambiente unda huesped por sinti un conexion profundo cu nan mes y cu Aruba. Nos ta sumamente orguyoso di nos ekipo excepcional na Bucuti y nos ta profundamente agradecido na nos huespednan maraviyoso cu a tuma e tempo pa vota pa nos.”
Un nivel di excelencia: World’s Best Awards
E Travel + Leisure World’s Best Awards ta un di e reconocementonan mas aprecia den industria di turismo. Casi 180.000 lector a somete mas cu 657.000 voto, evaluando mas cu 8.700 propiedad rond di mundo. Resortnan ta wordo evalua riba servicio, ubicacion, camber, facilidad, cuminda y balor general.
Tur respuesta ta wordo evalua den un rango di “malo” te “excelente,” y e puntuacion final ta representa e promedio general riba tur e criterionan menciona. Loke ta separa e ganadornan di otro ta nan capacidad pa crea recuerdonan duradero, unda cada detaye ta contribui na un experiencia inolvidabel cu ta keda presente den bo memoria pa hopi aña despues di bo biahe.
E unico resort na Aruba nombra den e lista di 2025
Pa ta e unico resort na Aruba reconoci den Travel + Leisure World’s Best Awards di e aña aki, entre miles di propiedad respeta rond di mundo, ta un refleho poderoso di loke biahero moderno realmente ta aprecia. Aparte di servicio excepcional y un ambiente trankil, e huespednan ta scoge un resort carbon-neutral cu ta reinverti activamente den su medio ambiente, su comunidad y su empleadonan. Bucuti & Tara ta sigui ricibi reconocemento mundial, no solamente pa e experiencia cu e ta brinda, pero tambe pa e sentido profundo di pertenencia, serenidad y proposito cu e ta stimula.
“Loke ta haci Bucuti & Tara diferente ta e pasion tras di cada detaye,” segun Rik van der Berg, Resort Manager. “Nos ta un luga unda pareha ta reconecta, unda bienestar ta un estilo di bida y sostenibilidad ta parti di nos identidad. Pa wordo reconoci door di nos huespednan cu ta aprecia e idealnan aki ta algo cu tin un gran balor pa nos ekipo henter.”
E zomer aki, Terra di Jeremy Ford lo habri su porta na Bucuti & Tara, introduciendo un experiencia culinario nobo di e chef premia cu Michelin star pa su restaurant prestigioso Stubborn Seed na Miami. Chef Ford ta posee un Michelin Star pa excelencia y un Michelin Green Star pa sostenibilidad, loke ta resulta den un alianza naturalmente harmonioso. Su filosofia ta uni sabor refina cu un respet profundo pa planeta, un bista cu ta alinea perfectamente cu e balornan di Bucuti & Tara.
Como e resort mas eco-certifica den Caribe y e unico hotel cu un certificado di carbon-neutralidad, Bucuti & Tara ta sinti gran orguyo di duna bonbini na un experiencia culinario unda gastronomia no ta solamente excepcional, pero tambe funda riba un proposito cu tin balor.
