Ivo Valdes di OPPA, despues di a reuni cu Formador - "Tur pais mester por reconoce, aprecia y duna balor na e grandinan"
ORANJESTAD (AAN): E organisacion di pensionadonan (OPPA) a reuni dialuna cu Formador di Gobierno, Evelyn Wever-Croes.
Ireno 'Ivo' Valdes, presidente di OPPA a duna di conoce cu nan a haya oportunidad di presenta nan puntonan di preocupacion cu nan kier pa e proximo gobierno duna atencion na dje.
El a bisa cu ora un hende bira pensionado tin e percepcion "cu ya bo no ta conta mas". Esey ta un percepcion cu mester desaparece.
Tur pais mester por reconoce, aprecia y duna balor na e grandinan, a remarca. OPPA a haya oportunidad di trece esey dilanti.
Valdes a agrega cu tambe nan a papia riba e necesidad di cuido medico general y AZV ta keda un topico hopi importante pa OPPA ya cu OPPA ta haya cu e pensionadonan no ta wordo bon trata door di e organo aki.
A papia tambe riba e Departamento di Impuesto pasobra ora di bira grandi ta wordo castiga door di e añanan pero tambe door di cierto instancianan manera entre otro DIMP y AZV, a señala.
Otro tema tabata Raad voor Ouderen, seguridad pa e grandinan, seguridad general, actividadnan social, e leynan. El a bisa cu Aruba tin hopi ley, pero no ta enforsa e leynan of no ta enforsa nan suficiente.
Riba enseñansa, a indica cu esaki ta hopi importante pa desaroyo continuo di un pais y mester dedica atencion na dje.
Banda di esaki a presenta algun cifra cu ta importante pa e gobierno nobo tene cuenta cu ne pasobra a ripara cu for di Januari pa 1 di Juli a muri 313 pensionado. Esey ta 52 pensionado pa luna. Esaki ta trece cu ne cierto preguntanan, Ivo Valdes a señala.
PETICION NA E GOBIERNO NOBO
OPPA a bin cu algun peticion na e proximo gobernantenan. "Por ehempel, no papia di nos grandinan, pero papia cu nan. No pensa pa nos grandinan, puntra nan kico nan ta pensa.
Valdes ta spera cu berdaderamente e preocupacionnan y e puntonan di atencion cu OPPA a trece dilanti ta haya oido di e proximo gobernantenan.
