ORANJESTAD (AAN) – Den conferencia di prensa di gobierno demisionario, den cuadro di e reunionnan entre Formador Evelyn Wever-Croes y stakeholders, señora Ronella Croes, CEO di Oficina di Turismo (ATA), a relata con e reunion entre Formador y Oficina di Turismo, a bay.
Ronela Croes a splica cu nan a enfoca riba dos punto den dos diferente seccion di informacion.
Un di nan ta e maneho di ATA mes, unda tin aspectonan hopi importante, con Aruba ta organiza su maneho den cual ATA tin un papel cardinal.
“Manera ta conoci nos ta lidera den diferente aspecto y pa nos ta importante pa sigur esnan presente sa diferente punto cu mester di atencion.
“E di dos seccion di nos presentacion ta mas bien, con pa asegura cu nos tin un maneho solido y duradero, pa loke ta trata e producto turistico. Pues, ta dos diferente aspecto”, Croes a reitera.
El a agrega cu por nota caba cu pa loke ta trata cifranan y desaroyo di con Aruba su turismo ta bayendo, ATA a dicidi pa laga esaki un tiki na banda ya cu esaki ta algo cu ta bin hopi dilanti.
“Pa loke ta trata ATA y su puntonan di atencion, nos a duna un recapitulacion pa esnan cu no ta mucho conoci cu e organizacion. Pero nos a pidi atencion si, pa e hecho cu ATA tambe a pasa den un aña hopi dificil pa loke ta trata e parti financiero: aña 2020 nos entrada tabata 62% menos compara cu aña 2019 y e entrada presupuesta pa aña 2021 ta 60% menos compara cu 2019”, Ronella Croes CEO di ATA a indica.
Croes a subraya cu te aworaki tin algun recuperacion den esaki pasobra e ta bayendo un tiki miho contrario na loke a wordo planifica, pero ainda mester di hopi atencion.
“Tambe nos a papia hopi di e presupuesto 2022, cu ta den desaroyo aworaki, y pa esaki nos a señala e hecho cu pa ATA ta hopi importante pa conta si, riba e modelo financiero cu ta un di e bentahanan clave pa Aruba, si nos compara nos maneho di turismo pa medio di ATA, compara cu otronan”, Croes a comenta.
El a splica cu e modelo aki a duna su resultado e ultimo añanan, si wak di 2011 bin dilanti, ora cu a independiza e aparato di ATA. “Miho nos turismo bay, mas nos por conta riba dje y viceversa; si bo tin e fondonan necesario bo por maneha y pusha e desaroyo aki. Algo cu nos a trece dilanti ta cu nos kier wordo inclui den cualkier dialogo, pa locual ta trata posible cambio di e modelo aki”, CEO di ATA a expresa.
El a agrega cu ATA mester ta na mesa cu su experticio pa asina no sacrifica of riesga e modelo di maneha turismo y, consecuentemente, e resultadonan cu ATA mester por conta riba dje, pa medio di turismo.
“Nos ta conciente cu e tarea ta hopi dificil na e momentonan aki; sigur hopi presion riba e aspecto financiero, pero e peticion ta pa nos salvaguardia locual ta e modelo di maneho di turismo di Aruba, entre otro su modelo financiero y tene cuenta cu esaki debidamente”, Ronella Croes a declara.
El a bisa cu ATA a señala varios aspecto mas, por ehemplo e ley di ATA pa esaki por traha mas eficiente. Tambe nan a bay hopi riba e desaroyo turistico duradero. “Aki ATA a señala cu nos peticion ta pa gobierno sigur, compromete su mes na un manera firme na e modelo cu nos ta yama ‘High value low impact tourism model’. E modelo aki ta conta cu multiple accion cu ta necesario, cu no ta solamente den man di ATA”, Croes a indica.
