Entre 25% pa 40% di pashentnan cu ta wordo manda Colombia no a pasa e ‘pre-screening’ necesario na Aruba

Director di AZV, Edwin Jacobs: *A constata discrepancia den diagnostico

ORANJESTAD (AAN): Durante conferencia di prensa di AZV, ing. Edwin Jacobs kende ta director, a mustra cu a descubri cu gran parti di pashentnan cu ta wordo manda pa haya tratamento na Colombia, no a ricibi e ‘pre-screening’ necesario na Aruba prome cu el a wordo manda pa e pais.

            Esey ta pone cu entre 25% pa 40% di pashentnan cu ta wordo manda Colombia pa operacion, no ta den condicion medico pa cuminza opera, pasobra e.o. nan presion ta halto, nan sucu ta halto, of nan biopsia no a yega aya. 

            Tur esaki ta crea tardanza pa haci cirugia, y ta haci pashentnan bira mas nervioso.  AZV ta bay haci cambio na tur esaki.  Fuera di esey esnan cu ta coordina na Colombia a logra haya varios aspecto cu por yuda AZV spaar placa, como parti di e Plan 2022.

            Jacobs a indica cu ta cuminsando 1 di April cu e destaho riba cuido na Colombia. El a bisa cu Colombia ta keda e partner principal pa loke ta cuido den exterior.

            Siman pasa e director di AZV a reuni cu e organisacion pa excelencia den salud, cual ta e organisacion cu ta monitorea e cobransanan na Colombia y ta yuda den facilitacion di e proceso.

            Nan a yuda identifica otro espacionan unda por coopera, optimalisa y reduci gastonan, a señala.

            Entre un 25 pa 40 porciento di aseguradonan cu ta yegando Colombia pa operacion no te den condicion medico pa cuminsa opera pasobra entre otro nan presion, nan sucu ta halto of nan biopsia no a yega.

            Esaki ta pone cu e aseguradonan aki tin cu keda un tempo adicional na Colombia cu ta trece insatisfaccion tambe y ta pone cu e pashent ta cuminsa bira nervioso pa motibo cu no tin un bon sistema di 'pre-screening' na Aruba, Edwin Jacobs a duna di conoce.

            E comision ta trahando riba e parti di optimalisacion den e parti aki di 'pre-screening' na Aruba. Esey tin cu bay reduci e estadia di e aseguradonan na Colombia den hospital y na Colombia mes, a señala.

            Tambe a identifica cu por percura pa si bin mihor comunicacion entre specialistanan di Hospitalnan cu ta bay contrata proximamente y aki na Aruba, pa asina prome cu e pashent bay tur informacion ta na ordo. Esey tambe ta bay yuda, a remarca.

            A constata tambe cu un 40% di e pashentnan cu ta yega Colombia, e tratamento no ta locual a wordo pidi na final di dia. Tin un discrepancia den diagnostico y esey por wordo evita via telemedicina.

            Colombia ta hopi avanza legalmente cu por haci uzo di telemedicina pa reduci gastonan, Jacobs a bisa.

            Pa loke ta e laboratorionan tambe mester bin un bon comprension entre e hospitalnan aya pa nan ta bon na altura cu e laboratorionan na Aruba ta bon certifica y door di e bon comunicacion ta acepta tur e testnan cu ta wordo haci na Aruba y cu no mester ripiti e testnan na Colombia, a remarca.

            A constata den esaki falta di comunicacion y esey AZV hunto cu e comision ta trahando riba dje  pa e contractnan nobo cu ta bay wordo traha habri e oportunidad tambe pa mehora esaki y reduci gastonan, e director di AZV a splica.

            Banda di esaki a papia tambe riba e posibilidad cu pa cierto enfermedadnan cu no ta urgente, por percura pa forma un grupo y ora cu e grupo ta suficientemente grandi ta trece specialistanan di pafo pa bin atende cu e grupo aki na Aruba mes, a señala.

            Ta trahando riba e plan 2022 pa despues bay den deliberacion y wak con por implementa esaki.