ORANJESTAD (AAN): Minister di Finanzas y Cultura Xiomara Maduro Dialuna durante un conferencia di prensa a papia riba e reunionnan cu el a participa na dje na Hulanda, pa loke ta e tereno financiero.
Segun Maduro, Aruba ta bezig cu e leynan di consenso di Reino y den nan tin e asina yama RAFT, pa supervision financiero cu ta drenta den e bachi di un ley di consensus di Reino.
“E trabaonan ta wordo haci, pero den preparacion di implementacion di esaki mi a tene algun reunion na Hulanda”.
Entre otro mi a reuni cu Richard van Zwol, kende ta miembro di e Conseho di Estado(Raad van State), como tambe miembro di e Camara Presupuestario Hulandes (Begrotingskamer) y esaki tabata un reunion importante buscando e solucionnan, pasobra nos tur sa cu e supervision financiero of cualkier mehoracion cu bo kier pa e parti financiero di Aruba, lo tin cu conta na un momento tambe cu un Begrotingskamer, segun e mandatario.
El a sigui bisa cu pesey el a intercambia pensamentonan cu van Zwol kende conoce Aruba y door di su conocemento tambe di e otro Begrotingskamers den Europa, a hiba un combersacion riba e grandura di un camara asina na Aruba, pero tambe hopi importante ta ubicacion di esaki.
“Ta importante pues unda bo ta ubica un Begrotingskamer den e constelacion cu nos conoce aki na Aruba”.
E trabao di e camara aki ta bay ta pa supervisa e normanan financiero y esaki bo ta bay tin mester di dje pa un bon maneho financiero pa pais Aruba, segun Maduro.
E minister a sigui bisa cu den cuadro di e mesun trabaonan pa mehoracion di e maneho financiero di Aruba, tambe Maduro a haci un bishita na e asina yama Dutch State Treasury Agency cu bao di instruccion di BZK ta percura pa por haya e fondonan pa Aruba por cubri locual ta e fianzanan cu Aruba ta haya for di Hulanda.
“Nos a bay pa nos ser a conoci cu nan y tambe intercambia informacion tecnicamente relevante pa locual ta e trabaonan cu ta wordo haci riba e nivel di ‘treasury’ na Aruba, pero tambe na Hulanda pa asina nos di cada banda por tin e conocimento y alinea e trabaonan cu tin cu wordo haci, segun Maduro.
