Durante e di 4 ola di Covid-19 na Aruba --- ORANJESTAD (AAN): Siguiendo cu e analisis di datonan relaciona cu e situacion di Covid-19 na Dr. Horacio Oduber Hospital durante e di 4 ola (juli - october 2021),
ta resalta cifranan cu tin di haber cu e tipo di malesanan cronico (comorbilidad) cu e pashentnan a presenta na ora di ingresa hospital.
E categorianan di comorbilidad investiga tabata e Indice Masa Corporal of Body Mass Index mayor of igual na 25 (BMI ≥ 25) cual ta wordo conoci como sobrepeso, cancer, presion halto (hipertension), enfermedad renal cronico (riñon), COPD (malesa di pulmon), diabetes y malesanan cardiaco.
Solamente menos di 15% di e pashentnan no tabata tin ningun comorbilidad.
Cerca e pashentnan vacuna, 58,5% tabata tin dos of mas comorbilidad. Den esnan no vacuna e porcentahe aki tabata menor (45,5%).
Segun informacion di Hospital, durante e periodo aki a ingresa 327 pashent cu Covid-19, di cual 56 a fayece. 43 na HOH na Aruba y 13 na Colombia.
