ORANJESTAD (AAN): For di 7 di februari Militarnan di Ehercito Real tin ehercicio na Aruba.
E Militarnan ta traha na e batayon ‘107 Aerial Systems’ procedente di ’t Harde na Hulanda, y nan ta specializa den ubicacion cu diferente tipo di drones. Pa por haci e ehercicio posibel, e Militarnan ta dispone tambe di nan propio auto y otro material militar.
E clima na Aruba ta ofrece e militarnan bon posibilidad pa traha hopi ora di vuelo y saca maximo rendimento for di e ehercicio. Na Hulanda e posibilidadnan durante winter ta limita. Ademas e ehercicio aki ta ofrece e chance pa traha hunto cu coleganan di ‘Marine Squadron Carib’ y cu Wardacosta Region Caribe, cu tambe ta activo na Aruba.
E Militarnan ta hospeda na Kazerne di Marina Savaneta y ta activo na diferente localidad riba e isla. Desde 10 di februari e prome vuelonan ta tuma luga y e ehercicio ta dura te cu 13 di Mart.
107 Aerial Systemsbatterij (107 ASBt): E asina yama 107 ASBt ta un unidad di inteligencia operativo specializa pa desplega sistemanan no- tripula (unmanned aerial system UAS), mihor conoci como ‘drone’. Cu e UAS e unidad ta recoge informacionnan cu otro unidadnan por haci uso di nan durante nan despliegue operativo.
E destacamentonan UAS aki tambe por keda desplega pa tareanan civil. Durante e ehercicio na Aruba e drone nan ta keda desplega solamente pa obhetivonan di practica. E imagennan cu e drone nan ta traha durante e ehercicio no ta keda warda.
Colaboracion cu Luxemburgo: 107 ASBt ta traha hunto cu Ehercito di Luxemburgo. Durante e ehercicio aki tambe ta un cantidad di colega ta bay bou di guia di instructornan di 107 ASBt pa asina nan haya experiencia cu bulamento cu e dronenan Hulandes.
