Minister Glenbert Croes:
ORANJESTAD (AAN) — Contestando un pregunta di prensa, den e caso aki di DIARIO, relaciona cu e caso di e ciudadano Dominicano Ariel Lopez, cu despues di a keda na Aruba dos aña, indocumenta, el a haya permiso pasobra e ta tata di un baby naci na Aruba.
E pregunta concreto ta si esaki no ta crea un precedente pa mas hende homber di afo bin Aruba y saca un hende muhe na estado y despues haci prueba di ADN, mustra cu e ta e tata y asina por keda na Aruba, y si tin un maneho pa para esaki tambe.
E mandatario a haya cu esaki ta un bon pregunta, y su contesta ta cu esey cuminza tuma lugar anto mester haci un evaluacion pa wak si nan ta haci maluso di e sistema, mescos cu ta wordo evalua matrimonio ficticio ta, wak si a purba casa falsamente pa establece un estadia.
En todo caso, segun e dignatario e maneho aki no ta uno nobo, e permiso pa “bizondere band” (relacion special) ta algo cu ta existi caba. “Pero si na dado momento ta purba di haci uso di esey nos lo cruza e brug pa wak si berdad ta haciendo mal uso di e sistema, pa evita; y nos reglanan, nos maneho y nos leynan no ta skirbi riba piedra.
Mester ta refleho di un maneho di un realidad na e momentonan ey. Si e realidadnan cambia manera a expresa, nos mester cambia maneho, nos mester cambia e ley, si un dado momento mester yega asina leu”, e dignatario a señala.
