Director di Aduana, Ricky Croes, ta splica:
ORANJESTAD (AAN) – Den conferencia di prensa, dialuna atardi, director di Aduana a splica tambe e simplificacion di tarifa di impuesto cu ta bay bin, for di 1 di Juli proximo, pa autonan cu un balor di 20 mil florin invoerrechten lo aumenta cu 2%.
Ricky Croes a menciona cu den e simplificacion di tarifa, for di 1 di Juli proximo lo bay na un tarifa pa tur auto. Actualmente e tarifanan ta 30, 40 y 50% dependiendo di e balor di e auto.
Na momento cu 1 di Juli drenta cu simplificacion di e tarifanan di invoerrechten lo bay na un tarifa cu ta 32% unda cu pa e tarifa di 30% cu tin actualmente e lo bay nifica un aumento di 2%. Mirando cu actualmente, ya e comerciantenan cu ta bende auto tin e BBO inclui den nan prijsnan, e unico diferencia cu ta bay tin akinan ta e 2%. Esaki, pasobra ora e comerciante bende e auto e tin su derecho di deduccion, pues e subida cu ta bay tin di invoerrechten, den e caso aki di 30% na 32% lo bay nifica den placa, un suma di 400 florin maximo, pero e por ta menos tambe.
Croes a agrega cu actualmente ora cu ta importa un auto na balor te cu 20 mil florin, ta paga 30% na invoerrechten. Esey kiermen cu aworaki cu e cambio di tarifa di 32% e ta bay subi cu 2% y e maximo ta 20.00 (balor di e auto) y for di entrante 1 di Juli e subida ta bay ta maximo 400 florin, cu ta 2% di 20.000 florin.
