Den e bario aki di Ponton e peaton ta core peligro debi na velocidad halto di chauffeurnan y acera chikito

ORANJESTAD (AAN) – Den e edicion di DIARIO di Diaranzon a keda publica un articulo tocante e camindanan di santo cu ta crea problema di salud pa diferente habitante di e area di Ponton situa drentando banda di Wema bay ariba.

            E articulo di awe ta referi na e peligro cu ta core e peaton cu tin cu cana e distancia di nan cas pa e parada di bus. Esaki debi cu e bandanan cu tin un pida di acera esaki ta sumamente small, y hopi biaha e autonan ta subi esakinan poniendo na peligro e seguridad di esnan cu ta cana eybanda, pasobra no tin otro scogencia.

            Patras di un propiedad a pone un borchi na bista di e chauffeurnan pa baha velocidad, pasobra eynan tin hopi mucha cu ta cana bay scol, pero asina mes nan ta core na velocidad halto sin tene cuenta cu no tin caminda adecua pa e peaton. Na lugar di core meymey di e caminda di asfalt y di esnan di santo, hopi chofer ta pasa rand di e aceranan (si por yam'e asina) super small cu tin prome cu pone pia na entrada di Wema, unda ya por hala rosea pa sigui cana na e bushalte.

            Ohala Departamento di Trafico por pone atencion na e relato aki. E ta un bario hopi pobla, unda e habitantenan no solamente ta sufri door di stof basta pisa, pero ta core peligro ora di cana como peaton.   Esaki fuera di e sushedad cu hendenan sin escrupulo a benta den e partinan no habita, cu por cierto ta basta tereno bashi cu tin.