Prijs di batata, yuca y batata dushi tambe a conoce aumento
ORANJESTAD (AAN): E indice di “Cuminda & servicio di catering” a registra un subida di 0.7% na Juli 2022, despues di un subida di 1.0% na Juni 2022. E indice di “Cuminda na cas” (0.8%) a registra un
subida, unda dies (10) di e diesun (11) indicenan di e gruponan di cuminda na cas a subi na Juli 2022. E indice di “Batata, yuca y batata dushi” a conoce e subida di mas grandi (13.8%) na Juli 2022. Otro subidanan significante a wordo registra den e indicenan di “Berdura” (1.3%), “Pisca y otro cuminda di lama” (1.2%) y “Pan y otro productonan di grano” (1.2%).
E indice di “Fruta” (-0.6%) a registra e unico caida na Juli 2022. Den e ultimo diesdos (12) lunanan e indice di “Cuminda & servicio di catering” a subi cu 9.5%. E indice di “Cuminda na cas” a conoce un subida di 11.0%, unda tur e diesun (11) indicenan di e gruponan di cuminda na cas a subi durante e ultimo aña.
E indice di “Azeta y otro productonan traha di vet” a subi cu 22.3%, e subida di mas grandi entre e gruponan di cuminda na cas. Otro subidanan significante a wordo registra den e indicenan di “Batata, yuca y batata dushi” (21.4%), “Carni” (14.7%), “Fruta” (13.1%), “Pisca y otro cuminda di lama” (12.4%) y “Lechi, keshi y webo” (12.0%).
E indice di “Cuminda pafo di cas” a subi cu 0.3% na Juli 2022 y a registra un subida di 6.0% den e ultimo diesdos (12) lunanan.
Na Juli 2022, “Cuminda na cas” y “Cuminda pafo di cas” como grupo, tabata tin un subida di prijs di 0.7% compara cu Juni 2022 y hunto tabata tin un influencia di 0.10 ppt riba e CPI, mientras cu e restante bienes y servicio hunto a experencia un subida di prijs di 1.3% y tabata tin un efecto di 1.06 ppt
riba e CPI.
