Guia special pa grupo cu a bay Hulanda y lo bolbe como profesional - Mester rescata balornan y mentalidad di Aruba den globalisacion di pensamento - Mester fomenta e sentido di responsabilidad y vigila cambio interes pa estudio
ORANJESTAD (AAN)- Un aña escolar nobo ta dilanti porta. E ciclo 2021-2022 ta wordo marca pa intentonan di comunidad pa bolbe na normalidad den un mundo cu ta trata di bandona e realidad di un pandemia cu vacuna ta trata di controla, pero ainda ta crea hopi incertidumbre pa futuro.
Na momento cu e prome muchanan wordo entrega na institutonan encarga actividadnan pre escolar, na schooolnan basico oficialmente e carera di un grupo grandi di mucha ta cuminsa, mientras cu na Hulanda y otro paisnan pero tambe na Aruba hobennan ta cuminsa cu estudionan avansa y mas halto pa habri nan caminda pa futuro.
“Bolbe Aruba” ta e pregunta cu mas cu nunca ta keda habri cerca un generacion, cu conoce e culminacion di globalisacion pero tambe di un educacion cu hopi bes no ta bay den profundidad di materianan importante pa un ser humano.
E formacion profesional ta central cerca e generacion mas hoben di Aruba, cu na cas tambe ta biba cu e efectonan di contenido nobo di “famia” cu den un cantidad demasiado halto ta fama dividi, loke ta afecta e sentido di maternidad y paternidad den un sociedad cu tanto mama y tata como parti di e forsa laboral pafo di cas.
Den e sociedad nobo e papel di madushi y padushi tambe ta cambia, pasobra nan tambe tin nan trabou pafo di cas, ta drenta etapa di anciano na forma independiente mientras finalmente casnan di cuido ta bira centro di e personanan, cu tabata tin un lugar special den seno familiar.
Mientras tecnologia ta exigi profesionalismo hasta pa personanan cu bandona hubentud y durante henter nan carera mester sigui educa nan mes, e formacion humano di e mucha ta exigi tur atencion pa asina sigura cu e mucha y hoben Arubano, ta sinti su mes Arubiano cu un base y mentalidad Arubano y un sentido di responsabilidad pa Aruba na un forma special.
Informacionnan inoficial ta indica cu un cantidad importante di hobennan ta descubri na cierto momento cu nan a scoge pa e estudio robes. E porcentahe di hobennan cu ta termina nan estudio den exterior of na Aruba, mester wordo bon studia.
Infancia y hubentud a cambia y comunidad ta na haltura di esaki.
Den opinionnan cu DIARIO a busca na Aruba, ta bini dilanti cu muchanan mester ricibi mas educacion riba historia di e pais y e lucha cu Aruba a hiba pa yega entre otro na su autonomia, ta celebra su Dia di Himno y Bandera.
Como resultado di globalisacion den hopi caso e mucha y hoben no ta lanta cu e interes pa Dera Gay y otro fiestanan cultural di Aruba. Nan interes ta pa Halloween, Pasco, Thanksgiving cu nan ni sikiera ta comprende.
Informacionnan cu DIARIO a ricibi ta papia di un cantidad halto di mucha cu no por canta Himno di Aruba y asina no por entrega e generacion cu ta sigui nan himno.
E mentalidad Arubano tabata conoce fe como un pilar den bida. “Danki Papa Dios pa e dia di awe” tabata parti di e cultura, basa riba fe, stimacion y amor pa prohimo cu no ta wordo entrega na e hoben na e forma cu tabata socede antes.
Un preocupacion ta e hecho cu muchanan no conoce canticanan di antes di Aruba cu nan no ta ricibi como herencia na scol.
Un punto directo cu ta uni pasado y presente na futuro, ta e interes pa planta. Ta wordo remarca cu antes na scol tabata tin un luga pa planta mata cu den futuro por duna sombra pa e siguiente generacionnan, si nan ta interesa pa sinta den naturalesa.
Por nota cu hopi mucha no kier ta mas den solo y tin como preocupacion mas grandi pa atende cu nan telefon celular.
Den e cuadro aki a mustra con na final di e ultimo aña escolar, na un scol tur mucha a ricibi un mata den pochi pa nan cultiva. Esaki ta mustra nan cu nan mester sembra pa cosecha.
Un asunto di preocupacion ta keda e falta di respet hopi bez cerca mucha pa nan curpa. Hopi mayor no ta educa nan yiunan cu e realidad di e peliger pa un hende mishi cu nan.
Mester splica nan cu si algo asina pasa, nan mester atende imediatamente cu nan mayor of cu nan maestronan cu segun hopi mayor, mester busca un lazo di mas confiansa cu e muchanan, cu ta comprende cu den tur problema nan, nan educador ta asisti nan y deshaci di peliger.
DIARIO lo sigui informa.
