ORANJESTAD (AAN) – Den cuadro di e reunionnan cu Formador Evelyn Wever-Croes y stakeholders, entorno di formacion di gobierno nobo, Clero Catolico tambe a forma parti di e encuentronan aki, y Pader Andres a referi na esaki den conferencia di prensa.
Pader Andres a bisa cu den e reunion cu Formador Wever-Croes y su team, el a gradici na prome lugar e cooperacion di gobierno durante e tempo dificil di pandemia, y el a expresa su deseo pa sigui coopera hunto den e etapa dificil cu ainda nos pais ta pasando aden.
Pastor Andres a splica cu Clero Catolico a destaca e importancia di tin contacto permanente cu Minister di Salud y di Asuntonan Social, mirando cu tin hopi hende cu nan ta atende den e Parokia, y cu ta sufri pa motibo di falta di trabao, alimento, entre otro.
El a comenta cu den e reunion tabata presente tambe e Sacerdote local Jairo Maduro, y un Diacono permanente. Nan a expone nan temanan di preocupacion y a pidi pa tene na cuenta e puntonan aki durante e siguiente gobernacion. Tambe a pone enfasis riba e leynan cu kizas gobierno ta bay introduci.
E sa cu den pasado gobierno a introduci diferente ley cu ta bay contra etica y moral y sentimento Cristian. E peticion di Clero tabata pa permiti su opinionnan, pa haci cierto forma di consulta. Mayoria di nos pueblo, e sacerdote a bisa, ta Catolico y Cristian, y pesey ta importante pa tene cuenta cu e sentimento aki.
Otro tema importante ta e famia, mirando cu tin leynan cu ta afecta famia, y cu tin desintegracion di famianan y hopi divorcio, y cu e pandemia ta afecta tambe. Pader Andres kier mira con, conhuntamente cu gobierno Clero Catolico por brinda apoyo moral, spiritual y material na nosd famianan.
Otro punto cu a bin dilanti ta e parti social. Pader Andres a splica cu den esaki Michael Nicolaas, cu ta responsable pa Aruba, representando Caritas Diocesano, a elabora tocante kico e parokianan ta haci pa esnan den necesidad. Tambe nan kier mira, si kizas lo tin cierto cambionan den maneho, si nan por tin mas participacion.
Pader Andres a splica tambe cu nan a comparti cu e parokianan cu a keda dividi den tres sector, y a base di e donacionnan cu nan a haya via Hulanda a traha un proyecto, pero actualmente nan ta masha limita, y loke nan ta haya cerca un pa comparti cu otro y Clero a splica kico nan tin na pecho, pa asina coopera cu e proyecto aki.
