Kwartiermaker Sabine De Groot:
ORANJESTAD (AAN)—DIARIO a entrevista Sabine De Groot, Kwartiermaker pa Enseñanza pa Empleo (EPE), ken a expresa cu nan ta cla cu e reto nobo pa loke ta trata cursonan nobo, cu ta den cuminza.
E cursonan nobo ta cuminza for di 17 di April pa dilanti. Esaki ta e tanda nobo, pasobra EPE ta conoci pa dos of tres biaha pa aña duna tur e cursonan.
Señora de Groot a comenta cu despues di Covid-19 no tabata facil pa lanta bek pero EPE ta hopi contento cu nan a logra, cu nan tin tur e docentenan cu a keda sostene e institucion, y nan tin e gruponan fiel cu semper ta bay na Enseñanza pa Empleo, pa sigui nan cursonan.
“Nos ta hopi orguyoso cu nos a logra di pasa den tur e cosnan aki, un biaha mas sobrebibi y ofrece nos cursonan” De Groot a expresa.
Pa aworaki EPE ta bay enfoca riba cursonan di Bar Tender y Waiters, cu ta bay wordo duna mainta y anochi y cu tin un duracion di 13 siman. Despues di 13 siman lo tin practica den e cursonan y seguidamente nan ta bay stage.
“Ta hopi importante cu nos cursonan ta envolve stage, pasobra stage ta duna e balor na unda nan ta bay traha y pesey semper nos ta pone enfoke riba stage y practica y tambe e teoria”, De Groot a indica.
Supervisor Manager ta un curso cu semper ta den demanda, mescos cu Costumer Services, Idiomanan semper ta bon bishita, y pa ultimo a bin un nobo cu ta “Dealer” cu awor ta bay habri pa publico tambe, señora Sabine De Groot a menciona. E curso aki ta pa hende cu ta drenta den e mercado di casino, y señora de Grot a menciona cu nan a logra di haci un proyecto piloto pa dos hotel grandi y renombra so, y e tabata asina exitoso cu su persona hunto cu e docentenan a dicidi di dune pa publico.
E curso aki ta tres bez pa siman durante 13 siman. E ta basta fuerte y ademas mester tin passport Hulandes, papel di bon conducta, cu ta un exigencia di e casinonan mes. Sin esey e persona no por traha den casino y EPE no por ofrece e curso na interesadonan cu no ta cumpli cu ambos rekisito.
