Enseñansa pa Empleo a prueba su derecho di existencia

Minister Glenbert Croes na ocasion di reapertura di EPE:

ORANJESTAD (AAN):  Ciere di Lago a trece hopi desafio pa nos Pais y nos Pueblo. Hopi hende a keda sin trabou. Hopi hende a bandona nos pais. Y esunnan cu tabatin nan specialidad den refineria a haya nan mes diripente sin trabou y sin posibilidad pa un otro trabou.

            Adicionalmente, Aruba e tempo aya a cuminsa concentra mas den desaroyo hotelero y turistico pues un cambio total di ofishi.

            Pa e motibo aki cu na 1988 a inicia cu e proyecto di Enseñansa pa Empleo cu mester a percura pa recapacitacion di nos hendenan cu a perde trabou den Refineria di Lago.

            Den presencia di Minister President Evelyn Wever Croes, Minister di Enseñansa Endy Croes, Minister di Turismo Dangui Oduber, Vice Presidente di Parlamento Raymond Kamperveen y Parlamentarionan Erasmus, Jarzagaray, Tevreden, Hoek y Berlis, stakeholders manera AHATA, HIAS, SNBA y VeneAruba, a efectua e reapertura di Enseñansa pa Empleo.

            Un instituto cu a recobra aun mas su balor e momento cu pandemia a bati na nos porta, cu a causa cu hendenan a perde trabou y mester a busca un alternativa pa por a sobrevivi. Recapacitacion di nos hendenan a bira prioridad nacional atrobe. Asina cu EPE a bin resorta bou di Minister Glenbert Croes, a pone man na obra pa reactiva EPE. EPE anno 2023 ta conta cu solamente 10 empleado bou guia di Sabine de Groot cu cifranan di adelanto impresionante.

            Aña 2022 EPE a conta cu 600 cursista. Pa aña 2023 ya ta bayendo na 1600 cursista cu e pronostico cu esaki ta bay sigui crece. Si aña pasa tabatin 19 curso cu a wordo duna na EPE, e aña aki esaki a aumenta na 27. Total cursista a crece di 620 pa 1630. Apoyo di sector priva tambe ta aumentando reconociendo e importancia y balor di Enseñansa pa Empleo.

            Minister Glenbert Croes a expresa su gratitud y orguyo na tur empleado cu ta trahando duro den un solo ekipo, demostrando cu EPE tin su lugar specialmente pa nos hendenan cu ta desea un miho trabou, pa por sigui cursonan cu ta wordo reconoci pa sector priva y na un tarifa social pa cartera di un y tur.

            E mandatario su orguyo a keda refleha durante e rueda di prensa caminda el a efectua cu cortamento di cinta, un EPE nobo, rebranded y cu animo renoba pa trece cursonan di gran balor pa nos pueblo, mas cerca di nos pueblo.