Jurette Croes, PR di DVG:
- DVG ta aconseha grupo di riesgo tuma vacuna anti influenza, y contra Covid
ORANJESTAD (AAN)- Matutino DIARIO a entrevista e Relacionista Publico di Departamento di Salubridad Publico, Jurette Croes, tocante e campaña anual di vacunacion contra Influenza cu ta tumando lugar, pa loke ta aña 2023-2024.
Croes a menciona cu tur aña DVG tin e campaña aki, dirigi na e grupo di riesgo. E cambio ta e aña aki, cu nan a agrega e vacuna di Covid-19, mirando cu esaki tambe ta un virus respiratorio cu ta afectando ainda e grupo di riesgo den nos comunidad, unda e persona ta bira malo y haya complicacion. Recientemente, tin un persona cu a fayece.
“Pesey nos ta encurasha personanan di riesgo, cu ta riba edad di 60 aña, hendenan cu ta sufri di malesanan cronico, of cu ta haci cu nan sistema immune ta baha, nos ta aconseha nan pa tuma nan vacuna di influenza cu por ta nan a custumbra di tuma cada aña, pero pa e aña aki considera pa tuma tambe e vacuna di Covid-19 cu ta bay bira di awo padilanti un vacuna anual”, Jurette Croes a duna di conoce.
Tambe tin e grupo di riesgo cu ta persona cu ta na cas riba cama y cu no por move. Mescos personanan cu ta handicap fisica of mentalmente, ta wordo aconseha pa nan tuma e vacuna. Riba facebook page, Departamento di Salubridad Publico (Directie Volksgezondheid) tin diferente informacion cu nos ta sugeri comunidad pa tuma nota di dje, si nan ta pensa cu nan ta personanan vulnerable, y kier sa mas informacion di esaki.
Croes a agrega cu na momento cu un persona cu sa cu ta vulnerable y e ta haya un virus respiratorio cu e ta bira mas malo cu normalmente, nan ta aconseh’e pa uza su mask tapaboca y mantene su mes di lugarnan unda tin hende malo, y tambe unda tin hopi hende. Seguidamente Jurette Croes a informa lugar, fecha y ora cu vacunacion ta bay ta tumando lugar. Den otro articulo, e informacion aki.
