ORANJESTAD (AAN): E asina yama “Sunrise City Coconut Collective” (SC3), ta un asociacion comunitario cu ta dedica na revitalisacion y empoderamento di San Nicolas.
Nan mision ta pa fortalece e spirito comunitario, promove orguyo cultural, y crea cambio positivo y duradero door di proyectonan y eventonan cu ta uni habitantenan y negoshinan di nos bario.
Un di nos iniciativanan coriente ta e proyecto “Let’s Rise Together, Let’s Thrive Together” bou di e programa Ban Biba Bario di CEDE Aruba, cu ta enfoca riba mehora nos bario, stimula participacion civico, y promove un San Nicolas mas limpi, sigur y vibrante.
E campaña pa concientisa nos comunidad, ta pa empodera residentenan di San Nicolas, y ta worde organiza rond di tres pilar principal: Auto-Suficiencia, Desaroyo Comunitario, y Educacion Financiero. Door di pone conocemento, hermentnan y recursonan na disposicion di e comunidad, e campaña ta desea di stimula orguyo, participacion y empoderamento, promove sostenibilidad y auto-suficiencia den nos bario.
E proyecto lo lansa oficialmente diasabra 15 di November pa 6:00 pm na The Hub at San Nicolas, unda nos lo cuminsa cu nos Youth Entrepreneurship Program. E programa aki ta completamente gratis y ta especialmente diseña pa hobennan y hoben-adultonan di ‘P’ariba di Brug’ di edad 18–35 aña.
Nan componente di educacion financiero ta desea di aumenta conosemento financiero den comunidad di San Nicolas y empodera hobennan entre 18–35 pa crea negoshinan sostenibel. Cu costo di bida cu ta subi y oportunidad di trabao cu ta limita, ta fundamental pa capacita nos comunidad pa maneha finansa personal, baha deuda, plania pa futuro, y pa crea fuentenan adicional di ingreso.
Pa medio di cuater workshop financiero, un programa di Youth Entrepreneurship, y un trayecto di mentoria, participantenan lo ricibi conocemento, hermentnan y apoyo necesario pa nan ideanan por bira realidad.
Nos comunidad ta invita pa tuma parti na e varios actividadnan cu nos lo lansa, incluyendo workshopnan cu tema di sostenibilidad, maneho di finansa, mehoramento di bario y pa finalisa e aña nos lo tene un San Nicolas Clean Up Day dia 6 di December.
