Concierto di Scol di Musica Rufo Wever

ORANJESTAD (AAN) – Recientemente, a tuma lugar e Concierto di Scol di Musica Rufo Wever, den Cas di Cultura.

E docente di Percusion, señor Carlos Bislip, a relata pa DIARIO cu e presentacion  aki tabata e concierto di ciere di aña escolar 2021-2022.

E docente a menciona cu Scol di Musica Rufo Wever ta ofrece les di diferente instrument, formacion general den musica, y tambe canto.

Edad di e alumnonan ta for di 7 aña te cu 62 y nan ta ofrece diferente stilo di musica, esta clasico y popular, jazz y folklore.

E Scol tin dos concierto grandi cu ta esaki di ciere di aña escolar, na Juni y e otro ta na December, unda tur e docentenan di instrument ta bin hunto cu nan alumnonan, pues e totalidad di e scol ta haci e presentacion.

Un concierto sigur hopi exitoso, yena cu talento local, y e publico a goza di dje inmensamente.