Mirto Lacle ta invita pueblo di Aruba:
ORANJESTAD (AAN) – Un encuentro Internacional, cultural, literario y linguistico ta bay tuma lugar na Biblioteca Nacional, dia 1 di Juni proximo, di 6 or di atardi pa 9 or di anochi. Asina e Gestor Cultural y Linguista Mirto Lacle, a duna di conoce den un conferencia di prensa.
El a indica cu e encuentro aki ta internacional, pasobra e ta dedica na e tres Islanan ruman: Aruba, Bonaire y Curacao (ABC).
Lacle a splica cu su persona hunto cu Biblioteca Nacional, lo presenta un programa multidisciplinario enfoca riba proverbio y dicho.
Lo tin personanan invita cu lo duna charla, y tambe tin presentacion di musica, canto y baile. Entre nan e figura central lo ta Wini Paulo for di Curacao, cu no ta desconoci na Aruba, ya cu den pasado a yega di presenta tres buki di proverbio y expresion.
Proverbio ta un forma di expresion cu a yega na e islanan ABC for di leu, y durante e encuentro lo haci un recorido door di Mirto Lacle mes, di e origen di proverbio, for di Africa te Caribe y Caribe Hulandes.
Wini Paulo ta bay presenta su buki nobo di Proverbio y dicho na Papiamento titula “Biba Palabra”. Lacle a subraya cu no ta lubida nos propio hendenan, den e caso aki Mario Dijkhoff (dfm).
Tambe lo tin e grupo di Baile Mardigra di Curacao, bao direccion di Jacqueline Nicia y Rudmila Alexander, cu bay deleita e publico cu diferente baile manera son montuno, salsa y tumba, ademas di caha di orgel.
Glenda Maria Tromp-Geerman lo deleita e publico ora cu e yega cu un caha di orgel di su propio produccion, yama Desiree. E ta bin cu dos tocado di wiri. E ta bay bek den tempo pa wak con hendenan antes tabata deleita.
Di Aruba, un persona naci na Bonaire pero cu por biba den dos y tres cultura cu ta Munye Winklaar-Oduber ta bay declama algun poema relaciona cu conmemoracion di 160 aña di Abolicion di Sclavitud, por ehemplo: Grito.
Di Bonaire lo bin e historiador Boi Antoin, cu lo presenta un charla tocante e “diferencia y similaridad” entre palabranan na Papiamento di e Islanan ABC.
{gallery}Encuentro Internacional Literario, Cultural y Linguistico na Biblioteca Nacional{/gallery}
