ORANJESTAD (AAN): E siman aki e noticia tristo a drenta cu e gran persona di sound system solido na Aruba,
cu pa hopi decada a sa di entretene na tur clase di evento, competencia, paradanan di Carnaval, y programa di radio, esta Eddy Tromp a fayece.
E ta conoci pa su servicio di musica cu speakernan potente marca Peavey, cu e tabata yama su mes “Eddy Tec”.
Su nomber mes ta Eduardo Tromp naci na Aruba dia 6 di Augustus 1942, pues tin 80 aña di edad. E tabata hopi tempo e persona principal como tecnico na e emisora Radio Kelkboom 1440 kHz.
E tabata operador silencioso, pues nunca no a papia den mic den aire. Pero na comienzo cu su aparatonan di Reel-to-Reel, e tabata subi caya cu su Van y speakernan pa asina ofrece servicio di entretenimento musical na fiesta di cas, of eventonan politico, y celebracion di scolnan.
Cu e conocido Ito Tromp, el a sa di guia pa hopi aña un di e popular programa di radio cu musica local, yama ‘Butishi di Alegria’ cu tabata toca tur Diadomingo na Radio Kelkboom.
El a labora tambe pa Biblioteca Nacional y Instituto di Cultura. Pa cualkier actividad den club of riba caminda publico, e ta yega pa pone su speakernan.
Eddy Tromp semper tabata un persona cu tabata anhela pa presenta e sonido di mas claro na tur actividad. Nunca bo tabata tende ‘hum’ den e musica den clubnan. Esey ta bin debi cu si acaso un waya di speaker cuminza traha malo, mesora Eddy ta bay, kita e waya ey y bente afo! Na su lugar e ta pone un waya completamente nobo. Eddy su filosofia tabata cu e no ta bay purba na drecha waya cu a daña, pasobra e chens ta grandi cu e waya ey lo sigui daña. Pesey e ta prefera di usa waya nobo.
E tabata traha trailernan pa core cu nan y anima gruponan Carnavalesco. E marca preferi di speaker di dje tabata ‘Peavey’, fabrica na Mississippi na Merca. Eddy tabata sa con potente e speakernan aki ta, y cu e por a depende riba nan.
Eddy a hala su ultimo rosea riba Diaranzon. Na su famia, DIARIO ta extende su mas profundo palabra di condolencia.
