Encuentro cu Cuerpo Consular y Ministerio di Relacion Exterior di Hulanda

Prome Minister Evelyn Wever-Croes

ORANJESTAD (AAN): Diamars 14 di mei, Prome Minister Evelyn Wever-Croes a reuni cu Cuerpo Consular di Aruba hunto cu representantenan di Ministerio di Relacion Exterior di Hulanda. E encuentro aki a wordo organisa pa e Departamento di Relacion Exterior di Aruba y tambe a conta cu presencia di varios otro profesional di Aruba.

            E intencion ta pa hunto cu Hulanda traha un manual protocolar pa asina tur e temanan cu e consulnan ta encontra a diario na momento di sirbi nan ciudadanonan, ta ancra den un documento. Prome Minister ta splica cu esaki lo ta un documento bibo y por añadi mas informacion na caminda ora ta necesario.

            “Mi a gradici e Cuerpo Consular pa nan presencia y pa traha hunto cu nos riba e manual aki. Tambe mi ta gradici nan pa e trabou cu nan ta haci pa e ciudadanonan cu nan ta representa kendenan a bin Aruba y a haci di Aruba nan hogar y asina ta yuda nos desaroya nos economia. Aruba ta un pais den cual tin mas di 100 nacionalidad ta biba y semper nos ta den harmonia cu otro y nos lo sigui busca y desaroya mas amistad y colaboracion pa asina hunto nos hiba e pais aki padilanti”, Prome Minister a remarca.