Aruba Lions Club cu bunita proyecto pa Dia di Mama

ORANJESTAD (AAN): Den transcurso di siman pasa e miembronan di Aruba Lions Club, a cuminsa prepara pa un proyecto pa e weekend di dia di mama.

            Un cantidad grandi di productonan di alimentacion a wordo paketa pa asina un gran cantidad di mamanan cu ta den un situacion poco dificil, por a ricibi un pakete cu a wordo reparti pa e miembronan di Aruba Lions Club.

            Durante diasabra y diadomingo e miembronan aki a sali den cayanan rond riba nos isla pa asina por a hasi entrega na diferente mamanan den nos comunidad.

Hopi mama a keda sumamente contento di por a ricibi un basket y ademas a ricibi tambe un cahita di bolo y cos dushi como muestra di cariño pa dia di mama.

            Mamanan cu a ricibi e paketenan aki no tabatin palabra suficiente pa por a gradici e miembronan di Aruba Lions Club cu e bunita gesto aki y tur gradiciendo pa e yudanza cu sigur lo yuda nan pa algun dia mas den e tempo dificil cu nan ta pasando aden.

            Un gesto y esfuerzo cu ta sali di cada un miembro di Aruba Lions Club cu ta hasi e trabou voluntario pa por yuda tur esnan den necesidad den nos comunidad, sigur cu e ayudo tambe semper cu ta bin for di e pueblo cu ta sostene cada actividad ora mester recauda fondo.

            Aruba Lions Cub ta e promer club di Lions na Aruba cu pa mas cu 75 aña ta sirbiendo comunidad cu bunita proyectonan y ta sigui traha pa cumpli cu su metanan.