Enberdad diferente dam rond di Aruba ta bashi pues no tira sushi riba nan

Randy Maduro, PR di Santa Rosa:

ORANJESTAD (AAN)-- Aruba ta pasando den un temporada di secure,  sin yobida, aunke ainda por planta un ke otro fruta of berdura. Pero por mira diferente dam rond di Aruba, practicamente bashi. Randy Maduro, Relacionista Publico di Santa Rosa, a comenta cu diferente persona ta punta di con no ta haci e damnan limpi, mirando cu nan ta bashi.

   Santa Rosa ta tuma nota di esaki, e funcionario a indica, pero mester ta conciente cu e dam berdad por ta bashi, pero no por lubida cu tin lodo abao.

   “Kiermen, si nos bay cu nos tractor y cuminza haci limpi, e tractor tin chens di pega den e lodo, cu ta algo cu a yega di pasa caba. Pero si, nos ta monitor esaki y ta simplemente ta tin’e bao di control, y haci un yamada na publico di Aruba, pa no tira sushi na oriya di e damnan pa ora bin awacero torencial e sushi no termina den e dam, of crea tipo di obstaculonan pa desvia e awa pa no yega na e dam. Percura tambe pa e rooi di bo cas ta bashi, y limpi, y pa ora tin yobida torencial e damnan por catch mas tanto awa posibel”, Randy Maduro a señala.

   El a agrega cu e dianan aki cu Santa Rosa ta buscando awa, nan ta premira cu e lunanan nos dilanti Aruba no ta bay haya un awacero torencial. Toch, tin yobida sporadico e dianan aki, y esaki no ta yuda, pero kizas un of otro agricultor chikito por ta  hopi contento, pero e demanda di awa semper ta keda halto na Santa Rosa.