Empresario nobo a cuminza bende aire di Medellin den boter

ORANJESTAD (AAN): Informacion for di Medellin (Colombia) ta indica cu tin un motibo pakico ora bishitantenan yega na e ciudad,

nan ta para y admira e bunita paisahe cu e lugar ey tin, y e holor di aire puro y fresco cu bo ta sinti eynan.

   Awor un empresario na Medellin a dicidi na cuminza bende e aire di e ciudad den boter.

   E hoben Juan Carlos Alvarado di 24 aña di edad, desde Diamars 9 di Augustus a lanza riba mercado un producto cu tin na cantidad na e ciudad ey, pero cu ningun hende antes a pensa di bende aire den boter di Medellin.

   Ta conoci cu esnan cu tabata bishita estado di Florida den decada di 1980 caba, na tempo di e boom di Disney World y comienzo di Universal Studios y tambe SeaWorld, cu bo por a cumpra aire di Orlando (Florida) den bleki.

   Awor tin ‘Real Aire de Medellín’, cu ta wordo bendi cu turistanan cu ta cana riba carrera 70, la comuna 13, y na El Poblado.  E descripcion imprimi riba e boter ta indica cu e producto ta ‘100% Real y Genuino’.

   Juan Carlos Alvarado ta un compositor y cantante di musica urbano na e ciudad, y el a bisa cu e idea di bende aire den boter a drenta su cabez dos luna pasa.  “Mi kier a bay dilanti cu mi carera y esaki ta un di e ideanan loco cu mi a haya despues di a confronta problema pa haya sponsors pa su carera.  E aire den boter na comienzo por ponebo smile, pero esaki ta un producto prepara, segun el a bisa.

   El a bisa cu e ta subi e sero di Tres Cruces, sero Nutibara, y e Alto de Palmas pa captura e esencia di e lugarnan ey.  El a bisa cu el a diseña un aparato cu ta colecta aire natural.  E boternan mes ta wordo laba special pa asina nan keda sin holor.  Despues nan ta pasa den un proceso unda ta agrega algun componente pa captura e esencia di loke ta e aire di Medellín.  Nan kier resalta e ciudad, y captura un holor di primavera.

   Den su prome dia riba mercado, a bende 77 boter.  E prome clientenan tabata turistanan di Barranquilla, pero tin turistanan di Ecuador, Peru, Italia, y Francia tambe cu a cumpra.