Empoderando lidernan di Bario pa medio di serie di training ‘Community Leadership’

ORANJESTAD (AAN): Den colaboracion cu Amalurra Consultancy, bao di liderato di Nicole Hart, BARiO UNICO (un programa di CEDE Aruba),

a lanza un serie di training cu ta yama Community Leadership.

   E nomber ta bisa tur cos, e programa aki ta diseña pa lidernan di programa den Centro di Bario pa duna nan e herramientanan y conocemento necesario pa lidera nan Centro di Bario y e comunidad unda e Centro di Bario ta ubica. E sesionnan di training a concentra riba strategianan pa fortalece e laso social den bario y desaroya proyectonan cu un impacto positivo pa comunidad.

   E iniciativa aki a culmina cu un evento dinamico den forma di café concepto cu a tuma lugar na Cas di Cultura, caminda lidernan di e Centro di Bario a presenta nan proyectonan innovativo na miembronan di sector priva. E proyecto aki a finalisa cu cinco proyecto pa diferente bario na Aruba cu e meta pa logra un impacto colectivo.

   “Nos meta ta crea un espacio caminda bon idea por topa cu gran oportunidad,” un representante di BARiO UNICO a bisa. “Nos ta hopi satisfecho cu e entusiasmo y creatividad di nos lidernan di programa ora nan a conta nan visionnan cu posibel colaboradornan.”

   BARiO UNICO y CEDE Aruba ta extende nan gratitud na ATA, Gamma IT Solutions, FLEXO Manpower Services Aruba y JADS Dive Center pa nan contribucion valioso cu a haci esaki posibel. E exito di e iniciativa aki ta danki na e presencia di e organizacionnan aki pero tambe nan sosten pa e proyectonan innovativo den barionan di Aruba.

   E movecion di construi comunidadnan fuerte y prospero ta depende di esfuerzonan di individuonan y organizacionnan. BARiO UNICO ta encurasha pa uni pa e causa aki door di contribui na proyectonan cu meta pa revitaliza Centronan di Bario.